झुलाघाटबाट शुरू भयो एमालेको संकल्प यात्रा
नेकपा (एमाले)को ‘झुलाघाट-चिवाभन्ज्याङ समृद्धिका लागि संकल्प यात्रा’ बिहीबार बैतडीको झुलाघाटबाट शुरू भएको छ।
पश्चिमी सीमानाका झुलाघाटमा एमालेका अध्यक्ष तथा पूर्व प्रधानमन्त्री केपी शर्मा ओलीले यात्राको उद्घाटन गरेका छन्। अध्यक्ष ओलीले नेपालको झण्डोत्तोलन गरेर संकल्प यात्रा शुरूआत गरेका हुन्।
अध्यक्ष ओलीले ‘समृद्ध नेपाल, सुखी नेपाली’ को परिकल्पना पूरा गर्न अभियान थालिएको बताए। राजनीतिक अस्थिरता अन्त्य गर्न र सकारात्मक परिवर्तनका लागि अभियान फलदायी हुने उनको भनाइ थियो।
संकल्प यात्रा उद्घाटनपछि आजै बैतडी सदरमुकाम गोठलापानीमा आयोजना गर्न लागेको आमसभालाई अध्यक्ष ओलीले सम्बोधन गर्ने कार्यक्रम रहेको एमाले बैतडीले जनाएको छ। आजै साँझ बैतडीको खोडपेमा बझाङका नेता तथा कार्यकर्तासँग अध्यक्ष ओलीको भेटघाट कार्यक्रम छ।
