आचार्य श्रीनिवासलाई सार्वजनिक शान्ति विरुद्धको कसूरमा मुद्दा
मेडिकल व्यवसायी दुर्गा प्रसाईंको आह्वानमा सोमबार गौशाला क्षेत्रमा भएको प्रदर्शनका क्रममा पक्राउ परेका धर्मगुरु बताउने आचार्य श्रीनिवासलाई प्रहरीले सार्वजनिक शान्ति विरुद्धको कसूरमा मुद्दा चलाएको छ।
त्रिशूल बोकेर प्रदर्शनमा उत्रेका श्रीनिवासले भेलालाई सम्बोधन पनि गरेका थिए। सोमबार प्रदर्शनकारीहरूले गौशाला चोकमा सडक अवरुद्ध गर्नुका साथै ढुंगामुढा गरेको भन्दै प्रहरीले बल प्रयोग गरी प्रसाईंका स्वकीय सचिव विनञ्जय थापा सहित १५ जनालाई पक्राउ गरेको थियो। थापालाई अभद्र व्यवहारको मुद्दा चलाइएको काठमाडौं परिसर प्रमुख, एसएसपी भूपेन्द्रबहादुर खत्रीले जानकारी दिए।
पक्राउ परेका १५ जनामध्ये श्रीनिवास र थापा सहित आठ जनालाई मंगलबार जिल्ला प्रशासन कार्यालय, काठमाडौंले तीन दिन म्याद थपेर हिरासतमा राख्न अनुमति दिएको छ। सार्वजनिक शान्ति विरुद्ध र अभद्र व्यवहारको मुद्दा प्रमुख जिल्ला अधिकारीले हेर्ने प्रावधान छ।
दुर्गा प्रसाईंका स्वकीय सचिव विनञ्जय थापा (बीचमा)।
मुलुकी अपराध संहिता, २०७४ को परिच्छेद २ अन्तर्गत दफा ६० को उपदफा ३ मा सार्वजनिक शान्ति विरुद्धको कसूरमा ६ महीनासम्म कैद र पाँच हजार रुपैयाँसम्म जरिवानाको व्यवस्था छ। उक्त कसूरमा हतियार सहित उत्रेर शान्ति सुव्यवस्थामा खलल पुर्याएमा एक वर्षसम्म कैद वा १० हजारसम्म जरिवाना वा दुवै दण्ड हुने उल्लेख छ।
प्रसाईं पक्षधर समूहले मंसीर ७ गतेदेखि काठमाडौंका विभिन्न क्षेत्रमा प्रदर्शन गर्दै आएका छन्।