भूकम्पमा परी घाइते भएका ४८ जना निको भएर घर फर्किए
जाजरकोट भूकम्पमा परी घाइते भई नेपालगन्जस्थित भेरी अस्पतालमा उपचारका लागि ल्याइएका ४८ बिरामी निको भएर घर फर्किएका छन्।
अब भूकम्पमा परी घाइते भएका जाजरकोट र रुकुमपश्चिमका ६ जना मात्र भेरी अस्पतालमा उपचाररत रहेको जिल्ला आपत्कालीन कार्य सञ्चालन केन्द्र बाँकेका स्रोतव्यक्ति नरेश श्रेष्ठले जानकारी दिए। “सबैजसो बिरामी निको भएर घर फर्किसक्नुभएको छ, अब भेरीमा शल्यक्रिया गरिएका ६ बिरामी मात्रै हुनुहुन्छ,” उनले भने, “उहाँहरूको स्वास्थ्य अवस्था सामान्य भएका कारण अस्पतालको ‘पेइङ वार्ड’ मा राखेर उपचार भइरहेको छ।”
भूकम्पमा घाइते भई उपचारका लागि भेरीमा आएका बिरामीलाई अस्पतालभित्र अलग्गै ‘डिजास्टर वार्ड’ तयार पारिएको थियो। बिरामी निको भएर घर फर्किएपछि उक्त वार्ड खाली गराइएको स्रोतव्यक्ति श्रेष्ठले बताए।
भूकम्पमा परी घाइते भई भेरीमा उपचार गर्न ल्याइएका तीन जनालाई काठमाडौं पठाइएको थियो भने एक जनाको अस्पताल ल्याउँदै गर्दा बाटोमै मृत्यु भएको थियो।
निको भएर घर फर्किएका बिरामीलाई घरसम्म पुर्याउन विभिन्न संघसंस्थाको समन्वयमा निःशुल्क यातायातको व्यवस्था गरिएको बाँकेका प्रमुख जिल्ला अधिकारी श्रवणकुमार पोखरेलले जानकारी दिए।
यही कात्तिक १६ गते राति जाजरकोटको रामीडाँडा केन्द्रबिन्दु बनाएर ६.४ म्याग्निच्यूडको भूकम्प गएको थियो। उक्त भूकम्पमा परी १५४ जनाको मृत्यु भएको छ भने ३४६ घाइते भएका छन्। भूकम्पबाट २६ हजार ५५७ निजी घर पूर्णरूपमा तथा ३५ हजार ४५५ घर आंशिक रूपमा क्षतिग्रस्त छन्। -रासस
-1732535850.jpg)
