नवलपरासी जीप दुर्घटनामा मृत्यु भएका चार जनाको सनाखत
नवलपरासी (बर्दघाट सुस्तापूर्व)को देवचुली नगरपालिका-९ मा जीप दुर्घटनामा परी मृत्यु भएका ६ जनामध्ये चार जनाको सनाखत भएको छ।
बौदीकाली गाउँपालिका, माझडाँडाबाट दलदले बजारतर्फ आउँदै गरेको लु १ ज ३२७० नम्बरको जीप देवचुली नगरपालिका-९, गोरेघुम्तीमा दुर्घटना हुँदा तीन महिला र तीन पुरुषको घटनास्थलमै मृत्यु भएको हो।
दुर्घटनामा मृत्यु हुनेमा जीप चालक बौदीकाली-६, माझडाँडाका २६ वर्षीय बहादुर आले मगर, सोही ठाउँका ५५ वर्षीय टेकमान ओनटाकी मगर, ५२ वर्षीया कुमारी राना तथा बुलिङटार गाउँपालिका-४, चुलिबोझाका १२ वर्षीया करिश्मा ठाडा रहेको जिल्ला प्रहरी कार्यालय नवलपरासी (बर्दघाट सुस्तापूर्व)का प्रहरी नायब उपरीक्षक वेदबहादुर पौडेलले जानकारी दिए।
मृतकमध्ये दुई जनाको अझै सनाखत हुन सकेको छैन। जीपमा सात जना सवार थिए।
दुर्घटनामा घाइते भएका मध्यबिन्दु नगरपालिका-२, मदनपुरका १८ वर्षीय चिरन अर्यालको चितवनको पुरानो मेडिकल कलेजमा उपचार भइरहेको प्रहरीले जनाएको छ। जीप अनियन्त्रित भई सडक छेउको घरमा ठोक्किएको थियो।
-1732535850.jpg)