भूकम्पमा मृत्यु हुनेको संख्या १२८ पुग्यो, १५५ घाइते
भूकम्पका कारण जाजरकोट र रुकुम पश्चिममा गरी हालसम्म १२८ जनाको मृत्यु भएको छ भने १५५ जना घाइते छन्।
सशस्त्र प्रहरी बल केन्द्रीय कार्यालयका प्रहरी नायब उपरीक्षक शैलेन्द्र थापाका अनुसार भूकम्पका कारण जाजरकोटमा ९२ जनाको मृत्यु भएको छ भने ७० जना घाइते छन्। यस्तै, रुकुम पश्चिममा भूकम्पबाट ३६ जनाको मृत्यु भएको छ भने ८५ जना घाइते छन्।
थापाका अनुसार भूकम्प प्रभावितको उद्धारमा जाजरकोटस्थित आश्रित गुल्मबाट सशस्त्र प्रहरी नायब उपरीक्षक विकास थापाको नेतृत्वमा ६७ जनाको टोली खटिएको छ। यस्तै, रुकुम पश्चिमस्थित नं ४७ गुल्मबाट सशस्त्र प्रहरी निरीक्षक झक्कुप्रसाद शर्माको नेतृत्वमा २४ जना तथा नं ४७ गुल्मबाट सशस्त्र प्रहरीका वरिष्ठ नायब निरीक्षक बलबहादुर थापाको नेतृत्वमा ११ जनाको टोली भूकम्प प्रभावित क्षेत्रमा खटिएको उनले बताए।
भूकम्पका कारण रोल्पामा एक जना घाइते छन्। रोल्पामा मानवीय क्षति भएको छैन।
भूकम्प प्रभावितको उद्धार तथा मद्दतका लागि सशस्त्र प्रहरी बल नं ३२ गण सुर्खेतबाट ३५ जनाको टोली जाजरकोटमा खटिएको छ। यस्तै, नं ६ बाहिनी सुर्खेतबाट एम्बुलेन्स सहित चिकित्सक टोली जाजरकोटमा खटिएको छ। थापाका अनुसार नं २९ गण दाङ र आश्रित गुल्म पूर्वी रुकुमबाट पनि प्रभावित क्षेत्रमा टोली खटिएको छ। बाँकेस्थित नं. ४२ रिजर्भ गणबाट २५ जनाको टोली जाजरकोटमा खटिएको छ।
यस्तै, नेपाल एपीएफ अस्पताल बलम्बुबाट डा. रोशन पराजुली सहितको नौ जनाको चिकित्सक टोलीलाई नेपाली सेनाको स्काई ट्रक मार्फत जाजरकोट पठाइएको सशस्त्र प्रहरी बलले जनाएको छ।
यसैगरी, जाजरकोट र रुकुम पश्चिमका भूकम्प प्रभावित क्षेत्रमा नेपाली सेनाको टोली उद्धार तथा राहत कार्यमा खटिएको नेपाली सेनाका प्रवक्ता सहायक रथी कृष्णप्रसाद भण्डारीले जानकारी दिए।
गएराति ११ः४७ बजे जाजरकोटको बारेकोट गाउँपालिका–१, रामीडाँडा केन्द्रबिन्दु भई ६.४ रेक्टर स्केलको भूकम्प गएको थियो।
-1732261651.jpg)
-1732259528.jpg)