गोली प्रहारबाट घाइते प्रधानाध्यापकको मृत्यु
अज्ञात समूहको आक्रमणबाट घाइते भएका बाराको कलैयास्थित बाल एकता बोर्डिङ स्कूलका प्रधानाध्यापक रूपेश सर्राफको मृत्यु भएको छ।
मोटरसाइकलमा आएका व्यक्तिहरूले सोमबार सर्राफलाई गोली हानेका थिए। उनको टाउको र छातीमा गोली लागेको थियो।
गम्भीर घाइते सर्राफलाई वीरगन्जस्थित नेपाल मेडिसिटी बयोधा अस्पतालमा भर्ना गरिएको थियो। उपचारका क्रममा उनको मृत्यु भएको जिल्ला प्रहरी कार्यालय, बाराका प्रहरी उपरीक्षक सुरेश काफ्लेले बताए।
विद्यालयबाट कलैया बजारतर्फ आउँदै गर्दा सोमबार दिउँसो १ बजेतिर कलैया उपमहानगरपालिकाको मदर्सा टोल नजिकै प्रधानाध्यापक सर्राफमाथि दुई राउन्ड गोली प्रहार भएको प्रहरीको भनाइ छ।
प्रधानाध्यापक सर्राफमाथि गोली प्रहार गर्नेहरू फरार छन्। उनीहरूको पहिचान पनि हुन सकेको छैन।
