बसको ठक्करबाट घाइते स्कुटर चालकको मृत्यु
पूर्व-पश्चिम राजमार्ग अन्तर्गत चितवनमा बसको ठक्करबाट घाइते भएका स्कुटर चालकको मृत्यु भएको छ।
चितवनको खैरहनी नगरपालिका-१ बहेरा चोकस्थित पूर्व-पश्चिम राजमार्गमा कात्तिक ९ गते साँझ पूर्वबाट पश्चिमतर्फ जाँदै गरेको बा ९६ प ३६३४ नम्बरको स्कुटरलाई विपरीत दिशाबाट आउँदै गरेको बा ३ ख २३५४ नम्बरको बसले ठक्कर दिएको थियो।
दुर्घटनामा स्कुटर चालक सिन्धुपाल्चोकको सुनकोशी गाउँपालिका-५ का २३ वर्षीय आनन लामा घाइते भएका थिए।
उनलाई उपचारका लागि पुरानो मेडिकल कलेजमा भर्ना गरिएको थियो। उनको उपचारका क्रममा मृत्यु भएको जिल्ला प्रहरी कार्यालय, चितवनले जनाएको छ।
शव परीक्षणका लागि भरतपुर अस्पतालको शवगृहमा राखिएको छ। ठक्कर दिने बस र बसका चालकलाई प्रहरीले नियन्त्रणमा लिएको छ।
