भूकम्प अपडेट : बझाङमा एक जनाको मृत्यु, १३५ घर भत्किए
मंगलबार गएको भूकम्पका कारण बझाङको जयपृथ्वी नगरपालिका-११, ओखलकी ४० वर्षीया गुनमती धामीको ज्यान गएको छ।
जिल्ला प्रहरी कार्यालयका सूचना अधिकारी एवं प्रहरी निरीक्षक दीपेश चौधरीका अनुसार भूकम्पपछिको पहिरोमा परेर धामीको मृत्यु भएको हो।
यस्तै, भूकम्पमा परी ११ जना घाइते छन्। दुई जना उपचारपछि घर फर्किएका छन् भने जिल्ला अस्पतालमा नौ जनाको उपचार भइरहेको छ। घाइते हुनेमा जयपृथ्वी नगरपालिका-११ की ७ वर्षीया सलिना जोशी, सोही ठाउँकी प्रमिला जोशी, खप्तडछान्ना गाउँपालिका-७ की १८ वर्षीया सुनीता रोकाया, जयपृथ्वी नगरपालिका-७ का ३ वर्षीय नितिक बोहारा, सोही ठाउँकी एलिसा बम छन्।
मष्टा-३ की १५ वर्षीया आँसु रोकाया, मष्टा-१ की १३ वर्षीया सविता रोकाया, सोही ठाउँकी ३६ वर्षीया शान्तिदेवी थापा, दुर्गाथली गाउँपालिका-६ का २३ वर्षीय अम्मर जाग्री, तलकोट गाउँपालिका-३ का १८ वर्षीय कमल कडाल र जयपृथ्वी नगरपालिका-१० की २० वर्षीया रमा परियार पनि घाइते भएका छन्।
प्रहरीका अनुसार भूकम्पबाट बझाङमा १३५ संरचनामा क्षति पुगेको छ। प्रहरी निरीक्षक चौधरीका अनुसार थलारामा ६० घरमा क्षति पुगेको छ। केदारस्यूँमा एक, वित्थडचिरमा दुई तथा बुंगल नगरपालिकामा चार घर पूर्ण रूपमा क्षतिग्रस्त छन्।
जयपृथ्वी नगरपालिकामा ४१ घरमा क्षति पुगेको प्रहरीले जनाएको छ। -रासस
