मलेखुमा ट्रकको ठक्करबाट दुई बालकको मृत्यु
धादिङको गजुरी गाउँपालिका-२, मलेखुस्थित मजुवामा ट्रकको ठक्करबाट दुई बालकको मृत्यु भएको छ।
ट्रकको ठक्करबाट सिद्धलेक गाउँपालिका-६ का निर्मल श्रेष्ठ र सञ्जीव श्रेष्ठको घटनास्थलमै ज्यान गएको जिल्ला प्रहरी कार्यालयका प्रहरी नायब उपरीक्षक सन्तुलालप्रसाद जैसवारले जानकारी दिए।
काठमाडौंबाट चितवनतर्फ जाँदै गरेको प्रदेश-०२-००१ख ६४१३ नम्बरको ट्रकले आज बिहान उनीहरूलाई ठक्कर दिएको थियो। मृतक दुवै बालक बागेश्वरी माध्यमिक विद्यालयमा कक्षा ८ मा अध्ययनरत थिए।
घटनापछि स्थानीयले क्षतिपूर्ति माग गर्दै पृथ्वी राजमार्गको मलेखु क्षेत्रमा यातायात बन्द गराएका छन्। ट्रक चालक रौतहटको चन्द्रपुर नगरपालिका-२ का ४१ वर्षीय अशोक बम्जनलाई प्रहरीले नियन्त्रणमा लिएको छ।
