यस वर्षको मनसुन केही दिन ढिलो बाहिरिने
यस वर्षको मनसुन केही दिन ढिलो गरी बाहिरिने जल तथा मौसम विज्ञान विभागले जनाएको छ।
विभागको मौसम पूर्वानुमान महाशाखाले विशेष बुलेटिन जारी गरी मनसुनको बहिर्गमन ढिलो हुने उल्लेख गरेको हो। नेपालबाट प्रायः अक्टोबर २ अर्थात् असोजको दोस्रो साताभित्र मनसुन बाहिरिने गरेको छ।
यस वर्ष मनसुन ढिलो गरी नेपाल भित्रिएको थियो। नेपालमा मनसुन भित्रिने सरदर मिति १३ जून हो। यस वर्षको मनसुन सरदर मितिभन्दा एक दिन ढिला गरी नेपालमा प्रवेश गरेको थियो।
महाशाखाले मनसुनको बहिर्गमन प्रक्रियालाई नियमित अनुगमन गरिरहेको जनाएको छ। मनसुन बहिर्गमनको ढिलाइले केही दिन वर्षा हुने महाशाखाको आकलन छ।
यससँगै हाल बंगालको खाडीको उत्तर-पश्चिम भागमा विकास भइरहेको न्यूनचापीय रेखा उत्तर-पश्चिम दिशातर्फ सर्ने सम्भावना रहेकाले पनि देशका केही स्थानमा वर्षाको सम्भावना रहेको महाशाखाले जनाएको छ। विशेष गरेर कोशी, मधेश, गण्डकी र लुम्बिनी प्रदेशका एक-दुई स्थानमा अत्यधिक वर्षा हुन सक्ने विभागको अनुमान छ।
मनसुनको ढिलाइ र न्यूनचापीय रेखाका कारण वर्षा हुँदा पहाडी भूभागमा पहिरो जाने, ठूला तथा साना नदी, खालामा पानीको सतह बढ्न सक्ने भएकाले सतर्कता अपनाउन महाशाखाले अनुरोध गरेको छ।
