सल्यानमा जीप दुर्घटना, दुई जनाको मृत्यु
सल्यानमा तरकारी बोकेको जीप दुर्घटना भएको छ।
रोल्पाबाट दाङको तुलसीपुर आउँदै गरेको रा१च १०२५ नम्बरको ‘सिंगल क्याब’ जीप आज बिहान कपुरकोट गाउँपालिका-३ चोरखोला नजिक सेतापैरामा दुर्घटना भएको हो।
जिल्ला प्रहरी कार्यालय, सल्यानका प्रहरी निरीक्षक गोपाल श्रेष्ठका अनुसार दुर्घटनामा दुई जनाको घटनास्थलमै मृत्यु भएको छ। मृतकको पहिचान खुलेको छैन।
यस्तै, सोही दुर्घटनामा एक जना घाइते छन्। घाइतेको राप्ती प्रादेशिक अस्पताल, तुलसीपुरमा उपचार भइरहेको छ।
जीप सडकबाट साढे ३०० मिटर तल खसेको प्रहरी निरीक्षक श्रेष्ठले जानकारी दिए।
