प्रधानमन्त्री दाहाल विरुद्धको मुद्दामा सर्वोच्चले मंसीर १८ मा फैसला सुनाउने
नेकपा (माओवादी केन्द्र)का अध्यक्ष एवं प्रधानमन्त्री पुष्पकमल दाहाल विरुद्ध परेको अदालतको अवहेलना मुद्दामा सर्वोच्च अदालतले मंसीर १८ मा फैसला सुनाउने भएको छ।
सर्वोच्च अदालतका न्यायाधीशद्वय ईश्वरप्रसाद खतिवडा र कुमार रेग्मीको संयुक्त इजलासले निर्णय सुनाउने (निसु) को आदेश दिएको छ। आइतबार भएको सुनुवाइपछि इजलासले निर्णय सुनाउने मिति तोकेको हो। आगामी मंसीर १८ निर्णय सुनाउने मिति तोकिएको सर्वोच्च अदालतका सूचना अधिकारी गोविन्दप्रसाद घिमिरेले बताए।
२०७३ सालमा दाहालले अदालतका आदेश विरुद्ध बोलेका थिए। उनले सार्वजनिक कार्यक्रममै अदालतले माओवादीलाई सिध्याउन खोजेको आरोप लगाएका थिए। शान्ति प्रक्रियाका नाममा माओवादी विरुद्ध अदालतले आदेश दिइरहेको दाहालको भनाइ थियो।
माओवादी नेता तथा कार्यकर्ता विरुद्ध परेका मुद्दामा छानीछानी आदेश आइरहेको भन्दै अदालतका आदेश नमान्ने धम्की दिएका थिए। यसले अदालतको अवहेलना गरेको भन्दै वरिष्ठ अधिवक्ता दिनेश त्रिपाठीले २०७३ जेठ १२ गते सर्वोच्चमा रिट दायर गरेका थिए।
त्यसमा पटक पटक पेशी स्थगित हुँदै आएको थियो। कैयौं पटक हेर्न नभ्याइनेमा परेको थियो। यसअघि २० पटक हेर्न नभ्याइने र दुई पटक स्थगित गरिएको मुद्दामा आइतबार सुनुवाइ भएको हो।
“लामो समयदेखि सुनुवाइ हुन सकेको थिएन। आज सुनवाइ भएर अलि ढिलै भए पनि फैसला सुनाउने मिति तोकिएको छ,” त्रिपाठीले भने,“यसमा खुशी नै छु।”
-1732180391.jpg)
-1732099242.jpg)