भारत र पाकिस्तान आज फेरि भिड्ने
वर्षाका कारण आइतबार अवरुद्ध भारत र पाकिस्तानबीचको खेल आज पुनः हुने भएको छ।
भारतले हिजो २४ ओभर एक बलमा दुई विकेट गुमाएर १४७ रन बनाएको थियो। आज दिउँसो ३:१५ मा यही अवस्थामा खेल शुरू हुनेछ।
जारी एशिया कपमा वर्षाको पूर्वानुमानसँगै भारत र पाकिस्तानबीचको ‘सुपर फोर’ को खेल र फाइनल खेलका लागि ‘रिजर्भ डे’ को व्यवस्था गरिएको छ। जस अनुसार आज रिजर्भ डेमा खेल हुन लागेको हो।
तर, आज पनि श्रीलंकाको कोलम्बोस्थित आर. प्रेमदास अन्तर्राष्ट्रिय क्रिकेट रङ्गशाला क्षेत्रमा पानी पर्ने सम्भावना छ।
आइतबार टस हारेर भारतले पहिला ब्याटिङ गर्ने निम्तो पाएको थियो। तर, पाकिस्तानी बलरसामु भारतीय ओपनर ब्याटरहरू खरो उत्रिए। रोहित शर्मा र शुभमन गिल दुवैले अर्धशतकीय पारी खेले। रोहित ५६ र शुभमन ५८ रन बनाएर क्रमशः शादाब खान र शाहीनशाह अफ्रिदीको बलमा आउट भए। आउट हुनुअघि यी दुईले १२१ रनको साझेदारी बनाएका थिए।
यसपछि मैदानमा उत्रिएका विराट कोहली र केएल राहुल क्रमशः आठ र १७ रनमा खेलिरहेका छन्।
भारतले आज पाकिस्तानको सामना गरेपछि भोलि श्रीलंकाको सामना गर्नेछ। अर्थात्, भारत तीन दिन लगातार मैदानमा उत्रनेछ।
एशिया कपको सुपर फोरमा अहिलेसम्म पाकिस्तान दुई अङ्क सहित शीर्ष स्थानमा छ। नेट रनरेटका आधारमा समान दुई अङ्क भएको श्रीलंका दोस्रो स्थानमा छ। भारतले अङ्क पाउन/नपाउने आज टुङ्गो लाग्नेछ भने दुई खेलमा हार बेहोरेको बाङ्लादेश अङ्कविहीन छ।
-1732180391.jpg)
