प्रज्वल पराजुलीको ‘चित्रलेखाको चौरासी’ सार्वजनिक
प्रज्वल पराजुलीको उपन्यास चित्रलेखाको चौरासी सार्वजनिक भएको छ। शनिबार आयोजित कार्यक्रममा पराजुलीले आफ्ना प्रिय लेखक नारायण वाग्लेलाई पुस्तक उपहार दिएपछि सार्वजनिक भएको घोषणा गरिएको थियो।
यो पुस्तक पराजुलीको सन् २०१३ मा प्रकाशित कृति ल्यान्ड ह्वेर आई फ्लीको नेपाली अनुवाद हो। यसको अनुवाद विभू लुइँटेलले गरेकी हुन्।
सिक्किमवासी लेखक पराजुलीको पहिलो पुस्तक द गुर्खाज डटर (कथासङ्ग्रह) सन् २०१२ मा बेलायतबाट प्रकाशन भएको थियो। उक्त पुस्तकलाई सन् २०१५ मा उक्त पुस्तकलाई गोर्खाकी छोरी शीर्षकमा नेपाली भाषाका पाठकमाझ ल्याएको पब्लिकेशन्स नेपालयले नै उनको यो दोस्रो कृति प्रकाशन गरेको हो।
पुस्तक सार्वजनिक समारोहमा पराजुलीसँग पठन संस्कृति प्रवर्द्धक एवम् लेखक सगुना शाहले संवाद गरेकी थिइन्। लेखक पराजुलीले यो उपन्यास हजुरआमाको चौरासीका लागि संसारभरबाट भेला भएका सन्तानहरूको भोगाइमा आधारित रहेको बताए। “त्यही कथानकका आधारमा अनूदित पुस्तकको नाम चित्रलेखाको चौरासी अझ बढी सान्दर्भिक लाग्यो,” उनले भने।
लेखक पराजुली र नारायण वाग्ले। मोहन पुन / नेपालय
पुस्तकको समीक्षा गर्दै शाहले यो उपन्यास आफूले अंग्रेजी भाषामै पढिसकेको जनाउँदै भनिन्, "कुशलतापूर्वक गरिएको नेपाली अनुवादमा यसका पात्र र परिवेशले अझ विविधता समेटेको पाएँ।"
पराजुलीको अघिल्लो आख्यान जस्तै यसमा पनि नेपाली पहिचान बोकेका पात्र र तिनका प्रवृत्तिको मिहिन चित्रण गरिएको छ। उनी दक्षिणएशियाली त्यसमा पनि विशेषगरी भारतीय उपमहाद्वीपभित्र समाजले वर्जित गरेका विषयलाई लेखनको प्राथमिकतामा राख्छन्।
ल्यान्ड ह्वेर आई फ्ली तीन वर्षअघिको ‘इमिल गिमेट प्राइज’ मनोनयनमा परेको थियो भने यसको फ्रान्सेली अनुवाद समेत त्यसै वर्ष उक्त मुलुकको ‘फस्ट नोबल प्राइज’ को मनोनयनमा परिसकेको छ। त्यसैगरी बेलायतको इन्डिपेन्डेन्ट, अमेरिकाको अ कान्सास सिटी स्टार र भारतको हिन्दूस्तान टाइम्सले आफ्ना समीक्षामा यसलाई वर्षकै उत्कृष्ट पुस्तकको सूचीमा राखेका थिए।
कार्यक्रममा पब्लिकेसन्स नेपालयका तर्फबाट बोल्दै किरणकृष्ण श्रेष्ठले साहित्यको अनुवादले निश्चित देश र परिवेशका कुरा संसारभर पुग्ने भएकाले यसको निकै महत्त्व रहेको बताए। नेपालमा अनुमति विना विदेशी किताबका अनुवाद प्रकाशन गर्ने प्रवृत्तिले नेपाली प्रकाशन उद्योगबारे अविश्वसनीय छवि बन्न सक्नेतर्फ पनि उनले चिन्ता प्रकट गरे। “पब्लिकेसन्स नेपालयले चाहिं फ्रान्सेली प्रकाशन गृहबाट अनुमति लिएरै आनी छोइङ डोल्माको जीवनी प्रकाशन गरे यता हालसम्म विदेशबाट प्रकाशित थुप्रै पुस्तक आधिकारिक रूपमा ल्याइसकेको छ,” उनले भने।
३८८ पृष्ठको यस पुस्तकको मूल्य ८७५ रुपैयाँ राखिएको छ। यो पुस्तकलाई विश्वभरका पाठकले अमेजनबाट र यसको इबूक थुप्रै डटकमबाट किन्न सक्ने प्रकाशन गृहले जनाएको छ।
