मेस्सीको आगमन यता पहिलो पटक गोलरहित बराबरीमा रोकियो मियामी
आज बिहान सम्पन्न इन्टर मियामी र न्याशभिलबीचको खेल गोलरहित बराबरीमा रोकिएको छ।
मेजर लिग सकर अन्तर्गतको खेलमा दुवै टोलीले राम्रा अवसर पाए पनि गोल गर्न सकेनन्। मियामी र न्याशभिलका गोलकिपरले आज केही राम्रा प्रहारलाई विफल पारेका थिए।
विश्वप्रसिद्ध फूटबलर लियोनल मेस्सीको आगमन यता मियामी पहिलो पटक बराबरीमा रोकिएको हो। यसअघि मियामीले निर्धारित ९० मिनेटमा जित हात पार्न नसके पनि पेनाल्टी शूटआउट मार्फत भने खेल जित्दै आएको थियो। यस्तै, मेस्सीको आगमन यता गोलरहित बराबरी पनि यो पहिलो पटक भएको हो।
करीब दुई साताअघि मात्र मियामीले न्याशभिललाई नै हराउँदै लिग्स कपको उपाधि जितेको थियो। मियामीले अब अर्को खेल आगामी सोमबार लस एन्जेलस फूटबल क्लब विरुद्ध खेल्नेछ।
मेजर लिग सकरको अङ्कतालिकमा इस्टर्न कन्फरेन्स अन्तर्गत मियामी १५ टोलीमध्ये अहिले १४औं स्थानमा छ। न्याशभिल भने सातौं स्थानमा छ। लस एन्जेलस भने वेस्टर्न कन्फरेन्सको दोस्रो स्थानमा छ।
-1732261651.jpg)
-1732259528.jpg)
-1732180391.jpg)