बारामा तीर्थयात्री चढेको बस दुर्घटना, ६ जनाको मृत्यु
पशुपतिनाथको दर्शन गरी फर्कंदै गरेका तीर्थयात्री सवार बस दुर्घटना भएको हो।
बारामा तीर्थयात्री बोकेको बस दुर्घटना हुँदा ६ जनाको मृत्यु भएको छ। काठमाडौंबाट जनकपुरतर्फ जाँदै गरेको मधेश प्रदेश-०३-००१ ख ७९९४ नम्बरको बस आज बिहान २ बजे बाराको जितपुर सिमरा उपमहानगरपालिका-२२, पूर्व-पश्चिम राजमार्गको चुरियामाई नजिक दुर्घटनामा परेको थियो।
दुर्घटनामा मृत्यु भएकाहरूको सनाखत हुन नसकेको प्रहरी प्रवक्ता प्रहरी नायब उपरीक्षक दधिराम न्यौपानेले जानकारी दिए। बसमा सवार २६ जनामध्ये तीन जनाको घटनास्थलमा तथा तीन जनाको उपचारका क्रममा मृत्यु भएको उनले बताए। मकवानपुरको हेटौंडास्थित विभिन्न अस्पतालमा घाइते यात्रुको उपचार भइरहेको छ।
बसमा अधिकांश भारतीय तीर्थयात्री रहेको प्रहरीले जनाएको छ। उनीहरू पशुपतिनाथको दर्शन गरी घर फर्किंदै थिए।
तीव्र गतिका कारण बस दुर्घटना भएको प्रहरीको अनुमान छ। दुर्घटनाबारे अनुसन्धान भइरहेको जिल्ला प्रहरी कार्यालयले जनाएको छ।
