काठमाडौं आउँदै गरेको रात्रिबस धादिङमा दुर्घटना
काठमाडौं आउँदै गरेको रात्रिबस पृथ्वी राजमार्गअन्तर्गत धादिङमा दुर्घटना हुँदा २६ यात्रु घाइते छन् भने तीन जनाको अवस्था गम्भीर छ।
दाङको तुलसीपुरबाट काठमाडौंतर्फ आउँदै गरेको बाग्मती प्रदेश ०३–००१ ख २६७५ नम्बरको रात्रिबस आज बिहान धादिङको बेनिघाट रोराङ गाउँपालिका–९, हुग्दीखोला नजिक दुर्घटना भएको हो।
दुर्घटनामा २६ जना घाइते छन्। घाइतेमध्ये पाँच जनालाई उपचारका लागि काठमाडौं पठाइएको जिल्ला प्रहरी कार्यालय, धादिङका प्रहरी नायब उपरीक्षक सन्तुलालप्रसाद जैसवालले बताए। अन्य घाइतेको मलेखुस्थित राजमार्ग अस्पताल र नजिकका स्वास्थ्य संस्थामा उपचार भइरहेको छ।
प्रहरी नायब उपरीक्षक जैसवालका अनुसार घाइतेमध्ये सल्यानको सबेश्वरी–३ का २४ वर्षीय राजेन्द्र पुन, उनका छोरा ६ वर्षीय आशिष केसी र सल्यानकै बाघचौर नगरपालिका–१० का ५० वर्षीय मानबहादुर खड्काको अवस्था गम्भीर छ।
घाइते यात्रुलाई प्रहरी र स्थानीय बासिन्दाले उद्धार गरेका थिए। बस अनियन्त्रित भएर सडकको दाहिने किनारातर्फ पल्टिएको प्रहरीले जनाएको छ।
