मदन पुरस्कारको श्रेष्ठ सूची सार्वजनिक
छनोट भएका उत्कृष्ट पाँचमध्ये एक कृतिलाई २०७९ सालको मदन पुरस्कार प्रदान गरिनेछ।
मदन पुरस्कार- २०७९ को श्रेष्ठ सूची सार्वजनिक भएको छ। मदन पुरस्कार गुठीले आज पाँच कृतिहरू छनोट गरी श्रेष्ठ सूची सार्वजनिक गरेको हो।
गुठीका अध्यक्ष कुन्द दीक्षितका अनुसार प्राप्त कुल ३१३ कृतिमध्ये पाँच उत्कृष्ट कृति छानिएको हो। यी पाँचमध्ये एकले सर्वश्रेष्ठ कृतिको रूपमा २०७९ सालको मदन पुरस्कार प्राप्त गर्नेछ।
उत्कृष्ट पाँचमा छनोट हुन सफल कृतिमा सुबिन भट्टराईको इजोरिया, विवेक ओझाको ऐंठन, द्वारिकानाथ ढुंगेलको चक्रव्यूहमा नेपालको जलस्रोत, प्रगति राईको थाङ्ग्रा र सञ्जय विष्टको माटाको घर छन्।
इजोरिया उपन्यास फाइनप्रिन्ट बूक्सले प्रकाशन गरेको हो। यो उपन्यासले तराईको सामान्य परिवारको सामान्य मान्छेको कथा पस्केको छ। मधेशको भाषा, वेशभूषा, जीवनशैली लगायत चित्रण गर्दै उपन्यासमा स्थानीय बोलीचालीको भाषाको प्रयोग गरिएको छ।
ऐंठन उपन्यास दुई दशकअघि माओवादी विद्रोहको वेला नेपाली समाजले भोगेको घटनाको विषयवस्तुमा आधारित छ। साङ्ग्रिला बूक्सद्वारा प्रकाशन गरिएको उपन्यासमा द्वन्द्वकालका भयावह र बर्बर घटना समेटिएका छन्।
चक्रव्यूहमा नेपालको जलस्रोत गैरआख्यान हो। सिमल बूक्स पब्लिकेशनद्वारा प्रकाशन गरिएको यो पुस्तक नेपाल सरकारका पूर्व सचिव ढुंगेलको पेशागत अनुभवको उपज हो। यसले जलस्रोत विषयमा प्रशासकका आँखाबाट देखिएका तथ्य उजागर गरेको छ। यसमा मुख्यतः महाकाली सन्धि र मन्त्रालयमा सोबारे गरिएको गृहकार्यको विवरण छ।
थाङ्ग्रा उपन्यास फिनिक्स बूक्सले प्रकाशन गरेको हो। यसमा उत्पीडित वर्ग, वंश, अधिकार र अन्तरजातीय विवाहको विषय समेटिएको छ। यसमा महिलालाई गरिने विभेदको विषय र समाजका विभिन्न पाटोलाई उजागर गरिएको छ।
माटाको घर उपन्यास साङ्ग्रिला बूक्सले प्रकाशन गरेको हो। भारतको गोर्खाल्यान्ड आन्दोलनको सेरोफेरोमा बुनिएको उपन्यासमा आन्दोलन र त्यसको सामाजिक प्रभाव ऐतिहासिक तथ्यका रूपमा अगाडि नबढाई आख्यानात्मक रूपमा पस्किइएको छ।
-1732261651.jpg)
-1732259528.jpg)