नापी अधिकृत विरुद्ध अख्तियारद्वारा मुद्दा दायर
अख्तियार दुरुपयोग अनुसन्धान आयोगले गैरकानूनी रूपमा सम्पत्ति आर्जन गरेको अभियोगमा नापी कार्यालय, चाबहिलमा कार्यरत नापी अधिकृत राजु पुरी विरुद्ध विशेष अदालतमा मुद्दा दायर गरेको छ।
आयोगले नापी अधिकृत पुरीको सार्वजनिक सेवा प्रवेश गरेदेखि गत असारसम्मको सम्पत्ति छानबिन गरेको थियो। आयोगका अनुसार पुरीले २०५२ पुस ९ गते सार्वजनिक सेवामा प्रवेश गरेका थिए।
यो अवधिमा पुरीको वैध आय रु.एक करोड २० लाख ७७ हजार ७४८ बराबर रहेको पाइएको छ। त्यसमा पारिश्रमिक, अन्य भत्ता, विभिन्न ब्यांक तथा वित्तीय संस्था वा सहकारीबाट प्राप्त रकम, ब्याज आय र जग्गाको मुआब्जा लगायत रहेको छ।
यो अवधिमा पुरीले दुई करोड २४ लाख ८१ हजार ६९० बराबरको खर्च तथा लगानी गरेको पाइएको छ। खर्चको तुलनामा आय कम रहेको तथा वैध स्रोत समेत नभएको पाइएकाले आयोगले नापी अधिकृत पुरी विरुद्ध एक करोड चार लाख तीन हजार ९४१ बराबरको बिगो दाबी गरिएको छ। आयोगले बिगो बमोजिम जरिवाना र कैद सजायको माग गरेको छ।
सार्वजनिक पदमा रहँदा गैरकानूनी रूपमा आर्जन गरेको सम्पत्ति र सोबाट बढे बढाएको सम्पत्ति श्रीमती सिर्जना गिरीको नाममा राखेको पाइएको छ। आयोगले सिर्जनालाई समेत प्रतिवादी कायम गर्दै आज विशेष अदालतमा मुद्दा दायर गरेको प्रवक्ता भोला दाहालले बताए।
