गायिका अंकिता पुनले ल्याइन् ‘माइली’ अल्बम
गायिका अंकिता पुनको माइली अल्बम सार्वजनिक भएको छ। ललितपुरको मोक्ष रेस्टुरेन्टमा मंगलबार आयोजित कार्यक्रममा सार्वजनिक अल्बममा ‘माइली’, ‘चार दिन चार जुनी’, ‘सखी’, ‘ऐना म’, ‘आधार’, ‘सिजेन्रो’ र ‘माया त यस्तै हो’ बोलका गीत समावेश छन्।
सातमध्ये ‘माइली’, ‘चार दिन चार जुनी’ र ‘सखी’ गीतका म्युजिक भिडिओ सार्वजनिक भइसकेका छन्। अल्बमका बाँकी चार गीतका भिडिओ शुक्रबारदेखि क्रमशः सार्वजनिक हुने जनाइएको छ।
कार्यक्रममा गायिका पुनको पहिलो साङ्गीतिक भ्रमणबारे जानकारी दिंदै आयोजक पूर्वाञ्चल रक्सले भारतको दार्जीलिङ र सिक्किमबाट अगस्ट दोस्रो सातादेखि भ्रमण शुरू हुने जनाएको छ। त्यसपछि काठमाडौं, पोखरा, बुटवल, दाङ, इटहरी, बिर्तामोड लगायत नेपालका प्रमुख सात शहरमा कन्सर्ट हुने साङ्गीतिक भ्रमणका व्यवस्थापक सुसन राईले जानकारी दिए।
नेपाल भ्रमण सकिएपछि विदेशमा कार्यक्रम हुने जानकारी दिंदै उनले हालसम्म अस्ट्रेलियाका केही शहरमा साङ्गीतिक भ्रमण तय भइसकेको बताए।
गायिका पुनले पहिलो साङ्गीतिक भ्रमण नजिकिंदै गर्दा आफू धेरै उत्साहित भएको बताइन्।
कन्सर्टलाई ‘रकिङ फिलिली’ ब्यान्डका सदस्यहरूले साथ दिनेछन्। कार्यक्रमको साउन्ड व्यवस्थापनको जिम्मेवारी विशाल नेपालीले गर्नेछन्।
साङ्गीतिक भ्रमणमा गितार सप म्युजिक पार्टनरका रूपमा छ भने कम्युनिकेसन्समा फर्स्ट लिंक र आइटीमा ओमकार कम्प्युटर्सले सघाउनेछन्।
-1732180391.jpg)
-1732099242.jpg)
-1732097316.jpg)
