पाँचथरमा जीप दुर्घटना: एक जनाको मृत्यु, १३ घाइते
घाइतेमध्ये दुई जनालाई थप उपचारका लागि झापा लगिएको छ।
पाँचथरको फिदिम नगरपालिका-२ कृष्ण मन्दिरमा आज जीप दुर्घटना हुँदा एक जनाको मृत्यु भएको छ। दुर्घटनामा १३ जना घाइते छन्।
झापाको बिर्तामोडबाट फिदिमतर्फ जाँदै गरेको मे१ज १९४१ नम्बरको जीप अनियन्त्रित भई सडकबाट करीब २०० मिटर तल खसेको हो। दुर्घटनामा ज्यान गुमाएका व्यक्तिको पहिचान खुल्न नसकेको प्रहरी निरीक्षक मिलन थापाले जानकारी दिए।
दुर्घटनामा इलामको दानाबारीका २६ वर्षीय अर्जुन विक, ताप्लेजुङको पाथीभरा याङवरक गाउँपालिका-१ का २३ वर्षीय बुद्धहाङ लिम्बू, ताप्लेजुङको मिक्वाखोला गाउँपालिका-५, पापुङका २६ वर्षीया इसेटिमा शेर्पा, पाँचथरको हिलिहाङ गाउँपालिका-१, अमरपुरका २५ वर्षीय रोशन श्रेष्ठ, सोही स्थानका २३ वर्षीय भूपेन्द्र श्रेष्ठ र ताप्लेजुङको सिरिजङ्घा गाउँपालिका-३, फावाखोलाका ३० वर्षीय सरोज मादेन घाइते भएका छन्।
यसैगरी, दुर्घटनामा परी ताप्लेजुङको फक्ताङलुङ गाउँपालिका-३ का २४ वर्षीय अजय लिम्बू, इलामको देउमाई नगरपालिका सिद्धिथुम्काकी १४ वर्षीया निरुता रम्तेल, कालीकोटका २२ वर्षीय सुमन खड्का, काठमाडौं बल्खुकी २० वर्षीया मीना लिम्बू, पाँचथरको फाल्गुनन्द गाउँपालिका-३ पौवासारतापका ३५ वर्षीय राम नेम्वाङ, पाँचथरको फिदिम नगरपालिका-१०, याङनामकी ४० वर्षीया सविना विक र सोही स्थानकी पाँच वर्षीया पुस्तिका विक घाइते भएका छन्।
घाइतेमध्ये मीना र सविनालाई थप उपचारका लागि झापा लगिएको जिल्ला प्रहरी कार्यालय, पाँचथरले जनाएको छ।
