जीप दुर्घटनामा सात वर्षीया बालिकाको मृत्यु, ११ जना घाइते
उकालो बाटोमा चढ्दै गरेको जीप अचानक अनियन्त्रित भई सडकबाट करिब ३०–३५ मिटर तल खसेको थियो।
पर्वतको कुस्मा नगरपालिका–३, दुर्लुङको गौडामुनीमा गए राति जीप दुर्घटना हुँदा एक बालिकाको मृत्यु भएको छ। सोही दुर्घटनामा परी ११ जना घाइते छन्।
जिल्ला ट्राफिक प्रहरी कार्यालय, पर्वतका प्रमुख सुमन निउरेका अनुसार सदरमुकाम कुस्माबाट दुर्लुङका लागि छुटेको ग१ज ५२२९ नम्बरको जीप दुर्घटनामा परेको थियो। दुर्घटनामा गम्भीर घाइते भएकी कुस्मा–३ की सात वर्षीया बालिका शीतल विकको उपचारका क्रममा निधन भएको हो। टाउको र आँखामा गम्भीर चोट लागेकी उनको उपचारकै क्रममा पर्वत अस्पतालमा मृत्यु भएको हो।
सोही स्थानका चार वर्षीय प्रिन्स क्षेत्री र ५० वर्षीया चन्द्रकला क्षेत्रीलाई थप उपचारका लागि गण्डकी अस्पताल पोखरा पठाइएको छ। प्रहरीका अनुसार उनीहरू दुवैको अवस्था मध्यम छ।
दुर्घटनामा परी दुर्लुङकै तीन वर्षीय सौरभ विक, २३ वर्षीया शान्ति विक, ७० वर्षीय कृष्णप्रसाद पाध्या, १६ वर्षीय निशान परियार, ५५ वर्षीया हीरादेवी मगर, ३५ वर्षीय मीनबहादुर क्षेत्री, ४७ वर्षीय अमृत शर्मा, ७६ वर्षीय भजत शर्मा, पोखरा बस्ने १६ वर्षीय अमर विक घाइते छन्।
उकालो बाटोमा चढ्दै गरेको जीप अचानक अनियन्त्रित भई सडकबाट करीब ३०–३५ मिटर तल खसेको थियो। जीपका चालक प्रहरीको नियन्त्रणमा रहेको र जीप घटनास्थलमा सवारीधनीको जिम्मामा रहेको प्रहरी निरीक्षक प्रकाश रावतले जानकारी दिए।
-1732855345.JPG)
