सडक विस्तारको विरोधमा प्रदर्शन
पूर्व-पश्चिम राजमार्ग विस्तारको विरोध गर्दै मकवानपुरका बासिन्दाले आइतबार हेटौंडामा प्रदर्शन गरेका छन्।
डिभिजन सडक कार्यालय, मकवानपुरले पूर्व-पश्चिम राजमार्ग अन्तर्गत हेटौंडाको रातमाटेदेखि बुद्धचोक हुँदै राप्ती पुलसम्मको सडक विस्तारका लागि ३५ दिने सूचना जारी गरेको छ। राजमार्गबाट २५ मिटरको क्षेत्रमा बनाएका संरचना हटाउन भनिएको छ। त्यसपछि विभागले संरचना हटाउने जनाएको छ।
यसको विरोधमा मकवानपुर उद्योग वाणिज्य संघ, हेटौंडा बसोबास संरक्षण मूल समितिको अगुवाइमा प्रदर्शन गरिएको हो।
स्थानीय बासिन्दाले क्षतिपूर्तिको ग्यारेन्टी गर्न, जाँचबुझ सहित विवरण यकीन गर्न माग गरेका छन्। यससँगै व्यक्तिगत सम्पत्तिमाथिको हक सुनिश्चित गर्न पनि आवाज उठाएका छन्।
हेटौंडा बजार परिक्रमापछि संघर्ष समितिका अध्यक्ष कृष्णकुमार गुप्ताले हेटौंडा उपमहानगरपालिका र डिभिजन सडक कार्यालयलाई ज्ञापनपत्र बुझाएका छन्। स्थानीय बासिन्दा र व्यापारीको मागको बेवास्ता गरी सडक विस्तार गरिएमा आन्दोलनमा उत्रिने गुप्ताले बताए।
