नौ घण्टापछि सञ्चालनमा आयो नारायणगढ–मुग्लिन सडक
नौ घण्टापछि सडक खुले पनि इच्छाकामना गाउँपालिका-५ स्थित तीन नम्बर पुलमा पहिरो खसेपछि सवारीसाधनलाई एकतर्फी गरिएको छ।
पहिरो पन्छाएपछि नारायणगढ–मुग्लिन सडकखण्ड सञ्चालनमा आएको छ। नौ घण्टापछि आज बिहानदेखि सडक सञ्चालनमा आएको हो।
चितवनको इच्छाकामना गाउँपालिका-६, कालीखोलामा शनिबार अपराह्न ४ बजे सुक्खा पहिरो खसेपछि सडक अवरुद्ध बनेको थियो। तीन एक्साभेटर र जेसीभी प्रयोग गरेर पहिरो पन्छाइएको थियो।
अहिले रोकिएका सवारीसाधन र यात्रु गन्तव्यतर्फ लागेको इलाका प्रहरी कार्यालय मुग्लिनका प्रमुख प्रहरी निरीक्षक विशाल तामाङले जानकारी दिए। उनले इच्छाकामना गाउँपालिका-५ स्थित तीन नम्बर पुलमा पहिरो खसेपछि सवारीसाधनलाई एकतर्फी गरिएको पनि बताए।
उनले मौसम र सडकको अवस्था बुझेर मात्र यस सडकखण्डको यात्रा गर्न अनुरोध गरे।
वर्षा लागेपछि पटक पटक पहिरो खस्दा यो सडकखण्ड अवरुद्ध हुँदै आएको छ। यो सडक हुँदै दैनिक हजारौं सवारीसाधन आउजाउ गर्ने गर्दछन्।
पटक पटक सडक बन्द हुँदा पूर्व र पश्चिम हुँदै काठमाडौं र पोखरा ओहोरदोहोर गर्ने यात्रु बढी मर्कामा परेका छन्।
-1732855345.JPG)
