‘हिन्दू–मुस्लिम मुद्दामा भारत प्रतिगमनतिर अग्रसर भइरहेको छ’
भारतीय लेखक विक्रम सेठ अ सुइटेबल गर्लको तयारीमा लागेका छन्। यो उनको ३० वर्ष पुरानो पुस्तक अ सुइटेबल ब्वाईको दोस्रो शृङ्खला हो।
भारतीय लेखक विक्रम सेठले समाज उदारताको साटो साँघुरो मानसिकतामा जकडिंदै गइरहेको बताएका छन्। आफ्नो पुस्तक अ सुइटेबल ब्वाई प्रकाशनको ३० वर्ष पुगेको अवसरमा इन्डिया टुडेका लागि लेखक अमित दीक्षितसँग कुरा गर्दै सेठले यो धमिलो वातावरण सङ्लिन एक पुस्ता नै लाग्ने र आफ्नो जीवनकालमा उन्नत भारतको परिदृश्य देख्न मुश्किल रहेको बताएका छन्।
“हिन्दू–मुस्लिम मुद्दामा हामी (भारत) प्रतिगमनतिर अग्रसर भइरहेका छौं। चुनावी फाइदाका लागि जानीजानी हाम्रा हृदयमा गुनासा, घृणा र पीडा भर्ने प्रयास भइरहेका छन्। हाम्रा नागरिकहरूलाई आफ्नै घरमा बाहिरिया जस्तो बनाउने खोजिएको छ। म यसलाई अराष्ट्रवादी, गैरभारतीय र निश्चय नै गैरहिन्दू व्यवहार भन्छु,” सेठले भनेका छन्।
उनले भारत आन्तरिक रूपमै समावेशी देश भएकाले र हिन्दू धर्म उदार भएकाले आशा गर्ने ठाउँ भनेको रहेको बताए। “तर त्यो मेरो जीवनकालमा चाहिं सम्भव देखिन्न,” सेठले भने।
पुस्तकको सन्दर्भमा उनले अ सुइटेबल ब्वाई यतिका समयसम्म प्रसिद्ध होला भनेर आफूले नसोचेको पनि बताए।
“पाठकले यसको मुख्य पात्र रूपा मेहरालाई धेरै नै मन पराए, जुन चरित्र मेरी नानी (हजुरआमा)मा आधारित थियो,” उनले भने, “पुस्तक पढिसकेपछि आउने प्रतिक्रिया पनि अनौठा थिए। एक जना पाठकले पुस्तक पढिसकेपछि रिसाएर किताबलाई कोठामा हुत्याएको सुनाएकी थिइन्। अर्की पाठकले भने पुस्तक पढिसकेपछि आफ्नो काँतर प्रेमीलाई प्रस्ताव गरिहालेको सुनाइन्।”
उनले पुस्तक लेख्न थाल्दा एक-दुई वटा विचार र उपाय मात्र दिमागमा रहेको पनि बताए। यसैकारण पुस्तक मोटो बन्ला भनेर आफूले नसोचेको उनले बताए। “यदि चरित्रहरू अनियन्त्रित र स्वतन्त्र नभएको भए म लेखनलाई आनन्दित मान्ने थिइनँ,” उनले भने।
सेठले आफ्नो प्रकाशक डेभिड डेभिदारले पुस्तकको पहिलो खाका पढेर उपयोगी सुझाव दिएको पनि बताए। पुस्तकलाई बेलायतमा भर्खर स्थापित भएको प्रकाशन गृह ओरियोनले छापेको थियो।
सेठ आफूलाई सबैभन्दा बढी कविता मन पर्ने बताउँछन्। र, आफूलाई जुन विधाले प्रेरित गर्छ त्यही विधा लेख्ने बताउँछन्। “कहिलेकाहीं त्यो विधा आफूले लेख्दै नलेखेको नयाँ विधा पनि हुन सक्छ। त्यसो गर्दाको जोखिम के हो भने म असफल हुन सकुँला, तर त्यसलाई म विपत्तिका रूपमा लिन्नँ,” सेठले भने।
एक हजार ५८४ पृष्ठको अ सुइटेबल ब्वाई प्रकाशन भएको ३०औं वार्षिकोत्सव पारेर भारतीय प्रकाशन स्पीकिङ ट्रीले तीन खण्डको नयाँ संस्करण समेत निकालेको छ।
सेठ अहिले अ सुइटेबल ब्वाईको दोस्रो शृङ्खला अ सुइटेबल गर्ललाई अन्तिम रूप दिन लागिपरेका छन्। उक्त पुस्तकको काम कहिले सकिएला भन्ने व्यग्रता आफूलाई पनि भएको उनले बताए। जति पटक समयसीमा तोके पनि घर्किरहेको बताउँदै सेठले अब चाहिं त्यसो नगर्ने प्रतिबद्धता समेत गरेका छन्। सेठले भने, “अ सुइटेबल गर्ल आफ्नो गतिमा आउनेछिन्, तर उनले छनोट गरेकै समयमा।”
-1732180391.jpg)
-1732099242.jpg)
