नारायणगढ-बुटवल सडक: घाम लाग्दा धुलो, पानी परे हिलो
चार लेनमा विस्तारका क्रममा रहेको नारायणगढ–बुटवल सडकखण्ड घाम लाग्दा धुलाम्मे र पानी पर्दा हिलाम्मे हुने गरेको छ। जसले गर्दा यात्रुले सास्ती भोग्दै आएका छन्।
योसँगै जिल्लाको कावासोतीदेखि दाउन्नेसम्म पानी पर्नासाथ राजमार्ग बन्द हुने स्थिति कायम छ। यस खण्डको विभिन्न स्थानमा निर्माण गरिएका डाइभर्सनका कारण पानी पर्नासाथ राजमार्ग बन्द हुने अवस्था छ। कतिपय पुल निर्माणका क्रममा छन्।
यसका कारण डाइभर्सनबाट सवारी पास गर्नुपर्ने अवस्था छ। डाइभर्सन निर्माण गरिएको स्थानमा रातोमाटो हुँदा पानी पर्नासाथ बाटो चिप्लो भएर यातायात सञ्चालनमा कठिनाइ हुने गरेको जिल्ला ट्राफिक प्रहरी कार्यालय, नवलपुरका प्रमुख गणेश पौडेलले बताए।
निर्माणको जिम्मा पाएको चाइना स्ट्रेट कर्पोरेशनले भने वर्षा शुरू हुनुपूर्व धेरै स्थानका पुल निर्माण सम्पन्न गरी ‘डाइभर्सन’ बाट यात्रा गर्नुपर्ने अवस्था अन्त्य गरिने दाबी गरेको छ। आयोजना प्रमुख राकेश झाका अनुसार केही दिनभित्रमा निर्माणसम्पन्न पुल सञ्चालन गर्ने तयारी छ। पानी पर्दा राजमार्ग बन्द नहोस् भनेर सम्भावित त्यस्ता स्थानमा कामलाई तीव्रता दिइएको उनले बताए।
उनका अनुसार नवलपुर खण्डमा हालसम्म दुवैतर्फ गरी जम्मा १४ किलोमिटर कालोपत्रेको काम सकिएको छ। हाल कावासोती-डन्डा क्षेत्रमा कालोपत्रे गर्ने योजना अनुसार काम अघि बढिरहेको छ।
विद्युत्का पोल तथा ट्रान्सफर्मर हटाउन ढिला हुँदा बजार क्षेत्रको काममा ढिलाइ भएको उनले बताए। “राजमार्ग क्षेत्रमा ट्रान्सफर्मर हटाउने तालिका मिलिरहेको छैन, बिदाको दिनमा मात्रै लाइन काटी काम गर्नुपर्ने अवस्था छ, यसले कामलाई अल्झाएको छ,” उनले भने। नारायणगढ–बुटवल सडक विस्तार कार्य २०७५ सालमा अघि बढेको थियो।
११४ किलोमिटर लम्बाइको सडकमा पूर्वी खण्ड र पश्चिम खण्ड गरी दुई योजना अन्तर्गत काम अघि बढाइएको छ। दुवै प्याकेजको निर्माण साढे तीन वर्षमा सम्पन्न गर्ने गरी चाइना स्टेट कन्स्ट्रक्सन कर्पोरेशनलाई जिम्मा दिइएको थियो। तर, निर्धारित समयमा काम सम्पन्न हुन नसकेपछि पटक पटक म्याद थप गरिएको छ। पछिल्लो पटक आउँदो भदौसम्मका लागि म्याद थप गरिएको छ।
यस अवधिमा आयोजनाको करीब ५० प्रतिशत काम मात्रै सम्पन्न हुने अवस्था छ। हालसम्म पूर्वी खण्डमा जम्मा ३८.५९ प्रतिशत काम सम्पन्न भएको आयोजनाले बताएको छ।
नवलपुरको गैंडाकोटदेखि दाउन्नेसम्म ६४.४२ किलोमिटर सडक ‘क’ खण्डमा राखिएको छ। दाउन्नेदेखि बुटवलसम्मको ४८.५८ किलोमिटर सडकलाई खण्ड ‘ख’ अन्तर्गत राखिएको छ।
सडक बस्ती क्षेत्रमा ६ लेन र जङ्गल क्षेत्रमा चार लेन तथा दाउन्नेमा तीन लेन विस्तार गर्ने गरी कुल १६ अर्ब ९९ करोड ५२ लाख लागतमा निर्माण सम्पन्न गर्ने गरी एशियाली विकास ब्यांकको ऋण सहयोगमा आयोजना अघि बढाइएको हो। –रासस
-1732261651.jpg)
-1732259528.jpg)