पूर्व मेयर शिव गिरीको दुर्घटनामा मृत्यु
स्याङ्जामा भएको सवारी दुर्घटनामा चापाकोट नगरपालिकाका पूर्व मेयर शिव गिरीको मृत्यु भएको छ।
गए राति बा १५ च १७०९ नम्बरको स्कारपियो अनियन्त्रित भई दुर्घटना हुँदा गिरीको मृत्यु भएको जिल्ला प्रहरी कार्यालय, स्याङ्जाका प्रवक्ता रवीन्द्र खनालले बताए। दुर्घटनामा घाइते भएका गिरीलाई उपचारका लागि जिल्ला अस्पताल लगिएको थियो। अस्पतालले राति ११:४० बजे मृत घोषणा गरेको खनालले बताए।
चापाकोट नगरपालिका-४ दार्सिङका ६० वर्षीय गिरी सवार स्कारपियो राङखोलाबाट स्याङ्जातर्फ जाँदै गर्दा गए राति ११ बजे पुतलीबजार-१० राङखोलास्थित सिद्धार्थ राजमार्गमा दुर्घटनामा परेको थियो।
प्रहरीले गाडी चालक पुतलीबजार-९ कोल्माका ३२ वर्षीय सुरज नेपाली र स्कारपियोलाई नियन्त्रणमा लिएको छ। दुर्घटनाबारे थप अनुसन्धान भइरहेको जिल्ला प्रहरी कार्यालयले जनाएको छ।
