पाल्पा जीप दुर्घटनामा चार जनाको मृत्यु
पाल्पाको रैना देवीछहरा गाउँपालिका-८ सत्यवतीस्थित किउरेछेडामा जीप दुर्घटना हुँदा चार जनाको मृत्यु भएको छ भने ११ जना घाइते भएका छन्।
रुपन्देहीको सालझन्डीबाट अर्घाखाँचीको पणेना जाँदै गरेको लु १ च ९०२४ नम्बरको जीप किउरेछेडामा दुर्घटना भएको हो। दुर्घटनामा चालक सहित तीन जनाको घटनास्थलमै मृत्यु भएको जिल्ला प्रहरी कार्यालयले जनाएको छ।
त्यस्तै, एक जनाको उपचारका क्रममा मृत्यु भएको जिल्ला प्रहरी कार्यालय पाल्पाका प्रवक्ता प्रहरी नायब उपरीक्षक (डीएसपी) वीरेन्द्र थापाले बताए।
डीएसपी थापाका अनुसार दुर्घटनामा अर्घाखाँचीको पाणिनी गाउँपालिका-१, पणेनाका जीप चालक २६ वर्षीय रमेश विक, ५५ वर्षीया श्यामकला परियार, पाणिनी-२, पोखराथोककी २५ वर्षीया सीता गौतम र दुई वर्षीय संयोग गौतमको ज्यान गएको छ। संयोगको उपचारका क्रममा र अन्यको घटनास्थलमा नै मृत्यु भएको प्रहरीले जनाएको छ।
घाइतेमध्ये पाँच जनाको अवस्था गम्भीर रहेको छ। गम्भीर घाइतेलाई थप उपचारका लागि बुटवलस्थित लुम्बिनी प्रादेशिक अस्पताल भर्ना गरिएको छ।
त्यस्तै, घाइते दुई जनाको चौराहा अस्पताल बुटवलमा र चार जनाको भैरहवा मेडिकल कलेजमा उपचार भइरहेको प्रहरीले जनाएको छ। जीप सडकदेखि करीब ७० मिटर तल खसेको छ।
-1732952633.jpg)
-1732855345.JPG)
