‘मोदीसँग खुलेर कुराकानी भयो’
_1685776648.jpg)
‘यसपटकको भारत भ्रमणको दीर्घकालीन र रणनीतिक अर्थ र महत्त्व रहेको मैले महसूस गरेको छु।’
प्रधानमन्त्री पुष्पकमल दाहाल भारतको चारदिने औपचारिक भ्रमणमा छन्। भ्रमणका क्रममा प्रधानमन्त्री पुष्पकमल दाहाल र भारतीय समकक्षी नरेन्द्र मोदीबीच ‘वान टु वान’ र प्रतिनिधिमण्डल स्तरमा वार्ता भएर नेपाल र भारतबीच विभिन्न द्विपक्षीय सम्झौता एवं समझदारी भएका छन्। जसमा ऊर्जा व्यापार र अन्तरदेशीय प्रसारण लाइन निर्माण, अन्तरदेशीय भुक्तानी, नेपालमा आर्थिक पूर्वाधार निर्माण, पारवहन सन्धि नवीकरण लगायत रहेका छन्।
दुवै देशका प्रधानमन्त्रीबाट समानता, आपसी सम्मान र विश्वासका आधारमा मैत्रीपूर्ण सम्बन्धलाई आगामी दिनमा सबल बनाउने प्रतिबद्धता व्यक्त भएको छ। भारत भ्रमणमा केन्द्रित रहेर प्रधानमन्त्री दाहालसँग राष्ट्रिय समाचार समिति (रासस) का विशेष समाचारदाता रमेश लम्सालले भारतको इन्दौरमा गरेको कुराकानीको सम्पादित अंशः
प्रधानमन्त्रीज्यू, यहाँको चौथो भारत भ्रमणलाई कसरी मूल्याङ्कन गर्नुभएको छ?
यो भ्रमण पहिलेका तुलनामा बढी फलदायी, दूरगामी प्रभाव पार्ने, नेपालको राष्ट्रिय हितमा केन्द्रित रह्यो। मुख्यतः आर्थिक क्रियाकलापमा सकारात्मक सन्देश दिने सफल भ्रमणका रूपमा मैले महसूस गरेको छु।
भ्रमण सफलताका आधारहरू के के हुन्?
पहिलो, भारतीय प्रधानमन्त्री नरेन्द्र मोदी र मेरा बीचमा खुलेर जसरी कुरा भयो, एउटा विश्वासको राम्रो वातावरण बन्यो। त्यो स्तरमा विगतमा खुलेर कुराकानी त्यति हुने गर्दैनथ्यो। यो हिसाबले पनि यसलाई मैले भिन्न र मौलिक ठानेको छु। तीन पटक नै ‘वान टु वान’ वार्ता भएको त होइन, ‘वान टु वान’ त एक पटक नै हो। अरू कार्यक्रममा जाने क्रममा पाँच-सात मिनेट हामी दुई जना मात्रै बसेर कुरा गर्ने अवसर भयो। त्यस अर्थमा पनि हरेक पटक अलि खुलेर विश्वासको वातावरण बनाउने र केही परिणाम निस्कने किसिमले जानुपर्छ भन्ने बन्यो।
दोस्रो, हामीकहाँ समस्या भन्ने गरिराखेका थियौं, नेपाली जनताको मनमा पनि त्यो कुरा गहिरोसँग थियो। सीमा समस्या हल हुन्छ कि हुँदैन, के होला भन्ने प्रश्न थियो, छ पनि। त्यसमा यसपटकको नयाँपन के देखियो भने सिमानाको समस्या सदाका निम्ति हल गर्नुपर्छ भन्ने कुरा भयो। प्रधानमन्त्री मोदीले संयुक्त पत्रकार सम्मेलनमा मैले भन्दा पनि पहिले सिमानाका समस्या समाधान गर्नुपर्छ भनेर बोल्नुभयो। नेपाल-भारत सम्बन्धलाई हिमालयको उचाइसम्म पुर्याउनुपर्छ भन्ने जसरी राखियो, त्यसले नयाँ सन्देश दिएको छ।
भारतीय प्रधानमन्त्री मोदीले नेपाल-भारत सम्बन्धलाई ‘सुपरहिट’ बनाउने र हिमाल जस्तै उचाइ दिने भन्नुभएको छ, यसको अर्थ के हुन सक्छ?
उहाँ पहिलो पटक सन् २०१४ मा नेपाल भ्रमणका क्रममा सदनमा बोल्दा ‘हिट’ को अर्थ लगाएर नेपाल-भारत सम्बन्धको चर्चा गर्नुभएको थियो। बीचमा जुन ‘गति’ मा जानुपर्थ्यो, गएन। अब त्यसलाई ‘सुपरहिट’ बनाउनुपर्छ भनेर उहाँले त्यति वेलाको आफ्नो सफल भ्रमणलाई जोडेर भन्नुभएको मैले महसूस गरेको छु। नेपाल-भारत सम्बन्धलाई धेरै नै माथि लानुपर्छ भनेर भन्ने नै त्यसको अर्थ हो। यो दुई शब्दको प्रयोगबाट भारतीय प्रधानमन्त्री निकै विश्वासका साथमा अब नेपाल-भारत सम्बन्धका सबै समस्या हल गर्नुपर्छ भन्ने मनस्थितिमा रहेको मैले ठानेको छु।
सिमानाका समस्या समाधान गर्नुपर्छ, यसलाई अड्काइराख्न हुँदैन भन्नेमा दुवै देश एउटा स्तरमा आइपुग्नु नै ठूलो कुरा लाग्छ। प्रधानमन्त्री मोदी र मेराबीचमा कुरा हुँदा भारत र बाङ्लादेशले सीमा समस्या हल गरेको चर्चा हामीले गरेकै हो। स्वयं प्रधानमन्त्री मोदीले लामो समयको मेहनत र गृहकार्यपछि त्यो सफलता प्राप्त भएको हो भनेर बताउनुभयो। नेपाल-भारतबीचको सीमा समस्यालाई राखिराख्न हुँदैन, यसलाई समाधान गर्नुपर्छ। बाङ्लादेश मोडल पनि एउटा अवसर हुन सक्छ, अर्को पनि हुन सक्छ। नेपालले इतिहासको तथ्य-तथ्याङ्कका आधारमा आफ्नो भनेको भूमिलाई भारतले छाड्दा पनि समाधान भई नै हाल्छ।
अर्को कुरा, धेरै ठाउँमा अप्ठ्यारो पर्यो भने सट्टपट्टा गर्ने चलन पनि छ। तर, अहिले नै यी विकल्पबारे हामी औपचारिक ढङ्गले प्रवेश गरेका छैनौं। नेपालमा पनि केही सीमा सम्बन्धी जानकारले बाङ्लादेश जाने बाटो हामीलाई दिने हो भने समस्या समाधान भइहाल्छ भनेर ल्याउने गर्नुभएको छ। तर, यी विकल्प अहिले भारत सरकारसँग औपचारिक रूपले प्रवेश गरेका विषय होइनन्। जे भए पनि सिमानाका समस्या अब हल गर्नुपर्छ भन्ने प्रतिबद्धताको तह अहिले नेपाल-भारतको अर्को उचाइमा पुगेको छ। यो सत्य हो।
भारतसँगको विद्युत् व्यापारमा केही महत्त्वपूर्ण निर्णय भएका छन्, १० वर्षमा १० हजार मेगावाट विद्युत् उत्पादन गरेर बिक्री गर्ने अवस्था सिर्जना भएको हो?
नेपालमा लामो समयदेखि बिजुली उत्पादन गर्ने तर बजारको सुनिश्चित नहुँदा उत्पादन मात्रै गरेर के हुन्छ भन्ने प्रश्न लगानीकर्ता र नेपाली विज्ञको मनमा रहँदै आएको प्रश्न हो। भारतसँग दीर्घकालीन व्यापार सम्झौता होस् भन्ने नेपालको चाहना हो। यसपटक त्यो विषयमा सम्झौता सम्पन्न भयो। १० वर्षमा १० हजार मेगावाट विद्युत् खरीद गर्ने स्वयं भारतीय प्रधानमन्त्री मोदीले आफैंले प्रस्ट भाषामा भन्नुभयो। त्यसको औपचारिकता करीब करीब केही दिनभित्र सबै टुङ्गिन्छ। यो ठूलो उपलब्धि हो।
बजारको सुनिश्चिताको अभावले लगानीकर्तालाई लगानी गर्न जुन समस्या हुन्थ्यो, त्यो अब रहेन। अब हामीले छिटो छिटो उत्पादन गर्ने दिशातर्फ जान सकिन्छ भन्ने मलाई लाग्छ। जे भए पनि यो समझदारी नेपालको राष्ट्रिय हित र दीर्घकालीन हितका निम्ति धेरै नै महत्त्वपूर्ण सहमति हो। यसले नेपालको अर्थतन्त्रलाई नयाँ गति दिन्छ भन्ने मेरो विश्वास हो। पश्चेश्वर बहुउद्देश्यीय आयोजनाको तीन महीनाभित्र विस्तृत परियोजना प्रतिवेदन (डीपीआर) तयार गर्ने, एक वर्षमा मोडालिटी निर्माण गर्ने भनेर भनिएको छ। त्यसलाई संयुक्त रूपले घोषणा गरिएको छ।
२६ वर्षदेखि रोकिएको कामलाई नयाँ ढङ्गले अगाडि बढाउने प्रक्रिया शुरू भएको छ। यो नेपालका लागि खुशीको कुरा हो, नेपाल, भारत र बाङ्लादेशका बीचमा विद्युत् व्यापारका सम्बन्धमा जे सहमति बन्यो। भारत र बाङ्लादेश, नेपाल र बाङ्लादेश, नेपाल र भारतबीच सबैका बीचमा सहमति भइसकेको छ। यो पनि नेपालको विद्युत् व्यापारका क्षेत्रमा यसले धेरै महत्त्वपूर्ण भूमिका खेल्छ। यो नेपालको राष्ट्रिय हितमा भएको अर्को महत्त्वपूर्ण उपलब्धि हो।
१० वर्षमा १० हजार मेगावाट विद्युत् खरीद गर्ने घोषणा केवल घोषणामै सीमित हुने हो कि भन्ने आशङ्का उब्जेको छ, यो कसरी अगाडि बढ्छ?
यसमा कसैले पनि आशङ्का गर्नुपर्ने कुनै ठाउँ छैन। दुई जना प्रधानमन्त्रीको औपचारिक वार्तापछि आयोजित पत्रकार सम्मेलनमा घोषणा गरिएको हो। भारतले केही प्राविधिक कारणबाट ‘क्याबिनेट’ बैठक बस्न बाँकी हो भनेर हामीलाई विश्वास दिलाएको छ। प्रधानमन्त्री मोदी जस्तो शक्तिशाली नेताले घोषणा गरेको कुरामा शङ्का गर्नु हाम्रै कमीकमजोरी हो जस्तो हुन्छ। शङ्का गर्ने कुनै ठाउँ छैन, यो अगाडि बढ्छ।
हवाई प्रवेश बिन्दुको विषय नेपालले उठाएको थियो, यस सन्दर्भमा के कुराकानी भयो?
एअर रूटका विषय नेपालले धेरै पहिलेदेखि उठाउँदै आएको विषय हो। यसपटक पनि मैले धेरै तयारीका सन्दर्भमा पनि सम्बन्धित मन्त्रालय र अधिकारीलाई यस विषयमा छलफल गर्न पहिले पनि दिल्ली पनि पठाएको हुँ। कुराकानी पनि भएको हो। सिमरा बाहेक हामीलाई सीधै अन्तर्राष्ट्रिय एअर रूटका रूपमा कम्तीमा एउटा रूट दिने भनेको हो। त्यही स्तरमा त यो पुगेन अहिले, तर कम ‘अल्टिच्यूड’ का जहाज भारतका विभिन्न शहर र नेपालगञ्ज जोड्ने भन्ने भएको छ, यो प्रारम्भिक राम्रो सङ्केत चाहिं हो। हामीले खोजेको जस्तो त होइन।
प्रधानमन्त्री मोदीसँग कुरा हुँदा पनि मैले भनेको छु, कम ‘अल्टिच्यूड’ बाट जहाज उड्न दिने सहमतिले एउटा सङ्केत त गरेको छ, नेपालको आवश्यकता र चाहनलाई सम्बोधन गरेको छैन, हामी के आशा गर्छौं भने छिटै फेरि ‘हाई अल्टिच्यूड’ जहाज पनि आउने गरी महेन्द्रनगर वा नेपालगञ्ज जता भए पनि एउटा एअर रूट प्राप्त हुने विश्वास गर्छौं भनेका छौं। मसँगको कुराकानीमा भारत सकारात्मक भएको पाएको छु। जे भए पनि एअर रूटको विषय जुन स्तरमा छलफल भयो र प्रारम्भिक रूपमा जुन सहमति भएको छ, नेपालका लागि महत्त्वपूर्ण कुरा हो भन्ने मलाई लाग्छ।
भारतको सबैभन्दा सफा शहर इन्दौरको भ्रमण गर्नुभयो, यहाँको फोहोर व्यवस्थापन सम्बन्धी अभ्यासबारे पनि जानकारी लिनुभयो। नेपालमा फोहोर व्यवस्थापन चुनौतीका रूपमा हेरिएको छ। यसबाट केही सिक्न सकिन्छ?
इन्दौर भारतकै प्रमुख सफा शहरमा दर्ज भएको छ। इन्दौरबाट केही सिक्न सकिन्छ, हेरौं भन्ने उद्देश्यबाट पुगिएको हो। हिजो हामीले त्यसको अवलोकन पनि गर्यौं। प्रस्तुति पनि हेरियो। यसबाट हामीले पाठ सिक्ने कुरा छन्। मैले के महसूस गरें भने सबैभन्दा ठूलो कुरा सरकारको प्रतिबद्धता हो। सरकार कति दृढ इच्छाशक्तिका साथ अगाडि जान चाहन्छ भन्ने महत्त्वपूर्ण देखें।
मध्यप्रदेश सरकार र इन्दौर नगरपालिकाको जुन पहलकदमी र प्रतिबद्धता देखें, यो धेरै ठूलो हो। सफा शहर बनाउन हर व्यक्तिले मेहनत गर्नुपर्छ भन्ने मनोभावना र चेतना पैदा गर्ने कुरा महत्त्वपूर्ण रहेछ। हाम्रा सन्दर्भमा आमजनतामा चेतना ल्याउनुपर्छ भन्नेमा पनि यो सम्बन्धित छ।
भारत भ्रमणबाट प्राप्त उपलब्धिबारे भन्न बाँकी केही छन्?
यसपटकको भारत भ्रमणको दीर्घकालीन र रणनीतिक अर्थ र महत्त्व रहेको मैले महसूस गरेको छु। कताकता नेपालमा हरेक कुरालाई नकारात्मक र शङ्काका नजरले हेर्ने भएका छौं, तर मलाई लाग्छ, यसपटक अलिकति सकारात्मक ढङ्गले सोच्ने, विषयलाई आवश्यकताभन्दा बढी राजनीतीकरण नगरी विकास, समृद्धि र आर्थिक क्रियाकलापलाई गति दिने कुरामा केन्द्रित हुन आवश्यक छ। त्यस अर्थमा यस भ्रमण ऐतिहासिक नै भएको छ।
-1732180391.jpg)
-1732099242.jpg)