महोत्तरीमा मिटरब्याजी विरुद्ध १७ सय उजुरी
महोत्तरीमा मिटरब्याजी विरुद्ध एक हजार ७३४ उजुरी परेका छन्।
महोत्तरीमा मिटरब्याजी विरुद्ध उजुरी पर्न थालेको छ। जिल्ला प्रशासन कार्यालयका सहायक प्रमुख जिल्ला अधिकारी उपेन्द्र न्यौपानेका अनुसार महोत्तरीमा हालसम्म मिटरब्याजी विरुद्ध एक हजार ७३४ उजुरी दर्ता भएका छन्।
सरकारले अध्यादेश ल्याउँदै अनुचित लेनदेन (मिटरब्याज) गरेका व्यक्तिलाई कारबाही गर्ने भन्दै पीडितलाई जिल्ला प्रशासन कार्यालयमा उजुरी दर्ता गराउन समय दिएपछि उजुरी दर्ता गराउनेको संख्या बढ्दै गएको हो। गत वैशाख १८ गतेदेखि पीडितले जिल्ला प्रशासन कार्यालयमा उजुरी दर्ता गर्न थालेका हुन्।
जिल्ला प्रशासन कार्यालयले मिटरब्याजी विरुद्ध उजुरी दर्ता गराउन आउने पीडितका लागि सूचना सङ्कलन गर्ने, परामर्श दिने र उजुरी दर्ता गर्ने काम गरिरहेको छ।
यसअघि जिल्ला प्रशासनले मिटरब्याजी विरुद्ध सरकारको उजुरी दर्ता गराउने अवधि किटान हुनुअघि पनि जिल्ला प्रशासन कार्यालयले मिटरब्याजी विरुद्ध ३२१ ठाडो निवेदन दर्ता गरेर आवश्यक कारबाही प्रक्रिया अगाडि बढाएको थियो। ३२१ निवेदनमध्ये २१ वटामा मिलापत्र, ३८ वटामाथि छानबिन गरिसकेको र केही मुद्दा जिल्ला अदालतमा कारबाही प्रक्रियामा रहेको सहायक प्रजिअ न्यौपानेले बताए।
जिल्ला प्रशासन कार्यालयमा आउने मिटरब्याज पीडित बढीजसो जिल्लाको उत्तरवर्ती क्षेत्रका छन्। अनिरुद्ध साह, श्याम परदेशी र सञ्जय रौनियार विरुद्ध सबैभन्दा बढी उजुरी परेको बताइएको छ। (रासस)
-1732261651.jpg)
-1732259528.jpg)
-1732180391.jpg)
