शायदै दोहोरिएला त्यो नाटकीय फाइनल
उपाधि भिडन्तमा हरेक बलले विश्व विजेता टोलीको भाग्य उलटफेर पारिरहेको नाटकीय रोमाञ्च विश्वकप क्रिकेटमा शायदै दोहोरिएला।
सबै तस्वीरः आइसीसी
एकदिवसीय खेलको सर्वोच्च प्रतियोगिता विश्वकप क्रिकेट–२०१९ समापन भएको एक साता बितिसकेको छ । तर न्यूजिल्याण्डलाई पराजित गर्दै इङ्ल्याण्डलाई विश्व च्याम्पियन बनाएको फाइनल खेलको चर्चा सेलाएको छैन ।
नाटकीय खेलको चर्चा हत्तपत्त सेलाउने पनि देखिंदैन । एकदिवसीय क्रिकेट र त्यसमा पनि विश्वकपको फाइनलमा यस्तो रोमाञ्च, कौतूहल, विवाद र आश्चर्यको मिश्रण शायदै देख्न पाइएला ।
एकदिवसीय क्रिकेटका निकै कम मात्र प्रतियोगिता ‘टाई’ हुने गरेका छन् । विश्वकपको फाइनल त्यसैमध्येको एक बन्नु अनौठो इतिहास भएको छ । एकदिवसीयमा सुपर ओभर नभएकोमा त्यो इतिहास पनि यही विश्वकपमा लेखिएको छ ।
निर्धारित ५० ओभरको खेलमा २४१ रनको बराबरी भएपछि खेलाइएको सुपर ओभर पनि १५/१५ रनको बराबरीमै टुंगियो । त्यसपछि विजेताको छिनोफानो दुई टोलीले प्रहार गरेको बाउन्ड्री (छक्का र चौका) गनेर गरियो । न्यूजिल्याण्ड १६ बाउन्ड्रीमा सीमित रहेकाले इङ्ल्याण्डले प्रहार गरेको २४ बाउन्ड्रीका आधारमा पहिलो पटक विश्व विजेताको ताज चुम्यो ।
नतिजा जति अस्वाभाविक थियो, प्रतिस्पर्धा उत्तिकै रोचक थियो । लर्डस् मैदानमा प्रत्यक्ष हेरिरहेका ३० हजार दर्शक र विश्वभरका करोडौं क्रिकेटप्रेमीका लागि विश्वकप फाइनल अद्भुत बन्यो । खेल सुपर ओभरसम्म पुग्दा क्रिकेटका पण्डितदेखि चर्चित क्रिकेटरसम्मले विस्मय माने । खेलको कमेन्ट्री गरिरहेका महान् क्रिकेटर सचिन तेन्दुलकर भन्दैथिए, “अब सबै भगवानको हातमा छ । यस्तो फाइनल त अब देख्न पाइन्न होला ।”
नाटकीय खेलमा केन विलियम्सको न्यूजिल्याण्डलाई हराउँदै इङ्ल्याण्डलाई विश्व विजेता बनाउने केही महत्वपूर्ण घटना भएका थिए, खेलको ‘टर्निङ प्वाइन्ट’ मानिएको ती प्रसंगको चर्चा गरौं ।
बोल्टको क्याच र डोरी
४९औं ओभरमा खेल चलिरहँदा इङ्ल्याण्डलाई उपाधि जित्न ९ बलमा २२ रनको खाँचो थियो । क्रिजमा रहेका इङ्ल्याण्डका बेन स्टोक्सको सामु बल बाउन्ड्री पार गर्नुको विकल्प थिएन । न्युजिल्याण्डका बलर जिमी निशामको बलमा स्टोक्सले छक्काको लागि लामो प्रहार गरे, तर बल डिप मिड विकेटमा गयो । त्यहाँ बसिरहेका फिल्डर ट्रेन्ट बोल्टले क्याच गरे ।
तर एकाध सेकेण्डमै कहानी बदलियो । बाउन्ड्री लाइनमा बल क्याच लिएपछि उनको दायाँ खुट्टाले मैदानभित्र टेके पनि बायाँ खुट्टाले बाउन्ड्रीको डोरीमा टेक्न पुग्यो । फलस्वरूप, मैदानमा जमिरहेका स्टोक्सले जीवनदान मात्र पाएनन्, उक्त बलले पनि छक्काको रुप पायो ।
बोल्ट तत्काल चनाखो भई नजिकको साथीलाई बल पास गरिदिएको भए स्थिति बेग्लै हुन्थ्यो । इङ्ल्याण्डले ८ बलमा २२ रन बनाउनुपर्ने हुन्थ्यो, जसले खेल न्यूजिल्याण्डको पक्षमा मोडिने निश्चित थियो ।
अन्तिम ओभरको ‘ओभर थ्रो’
खेल जित्न इङ्ल्याण्डलाई अन्तिम ओभरमा १५ रन आवश्यक भयो । बलिङका लागि ट्रेन्ट बोल्ट तयार थिए भने क्रिजमा बेन स्टोक्स नै थिए । पहिलो दुई बलमा बोल्टले कुनै रन दिएनन् । अब ४ बलमा १५ रन आवश्यक पर्यो । तेस्रो बलमा स्टोकले छक्का प्रहार गरिदिए । अन्तिम ओभरको चौथो बलमा भने अनौठो भयो ।
बोल्टले फालेको चौथो फुल टस बललाई स्टोक्सले डिप मिड विकेटमा प्रहार गरे, र रनका लागि दौडिए । उनी दोस्रो रनका लागि फर्किंदा फिल्डमा रहेका मार्टिन गुप्टिलले विकेटमा प्रहार गरे, तर बल स्टोक्सको ब्याटमा लागेर दिशा बदल्दै चौकामा परिणत हुनपुग्यो । अम्पायर कुमारा धर्मसेनाले लेग अम्पायरसँग परामर्श गरी स्टोक्सले लिएको २ रन र बाउन्ड्रीको ४ गरी इङ्ल्याण्डलाई ६ रन दिए ।
यो नाटकीय रन प्राप्त भएसँगै इङ्ल्याण्ड २ बलमा ३ रन लिनुपर्ने सहज स्थितिमा पुग्यो । यद्यपि त्यसपछिको दुई बलमा इङ्ल्याण्डले २ रन मात्र लिंदा खेल २४१/२४१ रनको बराबरीको स्थितिमा पुगेर सुपर ओभर आवश्यक भयो ।
विवादै विवाद
विश्वकप फाइनलको टकरावमा विस्मय मान्नुपर्ने अन्य धेरै घटनासँगै विवाद पनि छन् । विवादको मुख्य विषय त सुपर ओभर पनि बराबरी भएपछि बाउन्ड्रीको आधारमा विजेता छान्ने नियम बन्यो । थुप्रै क्रिकेटरले यसको आलोचना गरे ।
भारतीय क्रिकेटर राहुल द्रविडले उक्त नियमलाई ‘वाहियात्’ नै भने । धेरैले ट्रफी दुवै देशलाई बाँडेर संयुक्त विजेता बनाउनुपर्ने बताए । श्रीलंकाका हस्ती मुथैया मुरलिथरनले लेखे, “वास्तवमा दुवै टोली ट्रफीका हकदार हुन् । न्यूजिल्याण्ड कहाँ पराजित भएको छ र !”
मुख्य विवाद त ५०औं ओभरको ओभर थ्रोमा दिइएको ६ रनको बारेमा भयो । अन्तर्राष्ट्रिय क्रिकेट परिषद् (आईसीसी) का पूर्व अम्पायर सिमोन टफेलले त्यो ५ रन मात्र हुने तर्क गरेपछि त्यो विषय अझ तरंगित बन्यो । तर आईसीसीले यसबारे कुनै प्रतिक्रिया दिएको छैन । यस विषयमा न्यूजिल्याण्डका खेलाडीले आफ्नो टोली ठगिएको महसूस कत्तिको गरे ? ट्रेन्ट बोल्टको जवाफ थियो, “त्यस्तो छैन ।”
नतिजामा इङ्ल्याण्डले बाजी मारे पनि न्यूजिल्याण्डलाई पराजित नमान्नेहरूको संख्या ठूलो छ । केन विलियम्सको टोलीले सर्वत्र प्रशंसा पाएको छ । मुख्यतया, विश्वकपमा इङ्ल्याण्ड र न्यूजिल्याण्डबीचको फाइनलले ५० ओभरको क्रिकेटमा ज्यान भरिदिएको विश्व क्रिकेटको विश्लेषण छ । यसले क्रिकेट अब टी–ट्वान्टी शैलीको छायाँमा परिसक्यो भन्ने टिप्पणीलाई गलत साबित गरिदिएको छ ।
(स्रोतः विभिन्न समाचार एजेन्सी)
-1732261651.jpg)
-1732259528.jpg)