अब्दुलको शतकमा साउदी अरब विजयी
अब्दुल वाहीदले शतक प्रहार गरेपछि साउदी अरबले कतारलाई सात विकेटले पराजित गरेको छ।
एसीसी प्रिमियर कप अन्तर्गत शनिबार कीर्तिपुरस्थित त्रिवि क्रिकेट मैदानमा खेलमा साउदी अरबले सहज जित हासिल गरेको हो। कतारले दिएको २१७ रनको लक्ष्य साउदी अरबले ३४.२ ओभरमा तीन विकेट गुमाएर पूरा गरेको छ।
साउदी अरबका लागि अब्दुल वाहीदले १२४ रन बनाए। उनले १०८ बलमा २१ चौका र एक छक्का प्रहार गरे।
त्यस्तै, वाकार अल हसनले ५५, हिसान शेखले २१ र नमन अलीले पाँच रन बनाए। कतारका लागि इक्रामुल्लाह खानले दुई र खुराम शाहजादले एक विकेट लिए।
यसअघि ब्याटिङ गरेको कतारले ४९.५ ओभरमा सबै विकेट गुमाएर २१६ रन बनाएको थियो। कतारका लागि मोहम्मद तनवीरले ४६, कम्रान खानले ३६, इमल लियाङले ३१ र मोहम्मद रिजलानले २८ रन बनाए।
साउदी अरबका लागि इस्तिक अहम्मदले चार, अतिफ उर–रेहमान, जैन उल अबिदिन र अहम्मद बालड्रफले दुई–दुई विकेट लिए।
एसीसी प्रिमियर कप अन्तर्गत आइतबार त्रिवि क्रिकेट मैदानमा सिंगापुर र यूएई तथा मुलपानी क्रिकेट मैदानमा मलेसिया र ओमन प्रतिस्पर्धा गर्नेछन्।
नेपाल रहेको समूह ‘ए’ मा मलेशिया, ओमन, कतार र साउदी अरब छन्। त्यस्तै समूह ‘बी’ मा बहराइन, हङकङ, कुवेत, सिंगापुर र यूएई छन्। एसीसी प्रिमियर कपको विजेता टोलीले एशिया कप खेल्न पाउनेछ।
-1732261651.jpg)
-1732259528.jpg)
-1732180391.jpg)