बारा-२ मा २२ जनाको उम्मेदवारी

प्रतिनिधि सभाको उपनिर्वाचनका लागि बारा-२ मा २२ जनाले उम्मेदवारी दर्ता गराएका छन्।

निर्वाचन अधिकृतको कार्यालयका अनुसार विभिन्न राजनीतिक दल र स्वतन्त्र गरी २२ जनाको उम्मेदवारी परेको छ। जसमध्ये सात जना दलगत उम्मेदावर छन् भने बाँकी स्वतन्त्र छन्।

सत्तारूढ गठबन्धनका तर्फबाट जनता समाजवादी पार्टी (जसपा)को अध्यक्ष उपेन्द्र यादवले उम्मेदवारी दर्ता गराएका छन्। नाराजुलूस सहित निर्वाचन अधिकृतको कार्यालय पुगेका यादवले बाराको विकासका लागि उम्मेदवारी दिएको जिकिर गरेका छन्।

उपेन्द्र यादव।

उनी गत मंसीर ४ गते भएको निर्वाचनमा सप्तरी-२ मा जनमत पार्टीका अध्यक्ष सीके राउतसँग पराजित भएका थिए। त्यति वेला उनलाई नेकपा (एमाले)ले समर्थन गरेको थियो। अहिले पनि गठबन्धनमा रहेका नेपाली कांग्रेस, नेकपा (माओवादी केन्द्र), नेकपा (एकीकृत समाजवादी), लोकतान्त्रिक समाजवादी पार्टी, राष्ट्रिय जनमोर्चा लगायतका पार्टीले समर्थन गरेका छन्।

त्यस्तै, जनमत पार्टीका तर्फबाट शिवचन्द्र कुसवाहाले उम्मेदवारी दिएका छन्। उनी गत निर्वाचनमा यही क्षेत्रमा ३५४ मतले पराजित भएका थिए। त्यति वेला उनी माओवादीबाट चुनाव लडेका थिए।

शिवचन्द्र कुशवाहा।

अहिले माओवादीले यादवलाई समर्थन गर्ने तय भएपछि उनी जनमत पार्टीमा प्रवेश गरेका थिए। अघिल्लो निर्वाचनमा आफू थोरै मतले पराजित भए पनि जनताले आफ्नो प्रतिनिधिका रूपमा हेर्न चाहेकाले पार्टी परिवर्तन गरेर भए पनि उम्मेदवार बनेको उनको भनाइ छ।

नेकपा (एमाले)बाट पुरुषोत्तम पौडेलले उम्मेदवारी दर्ता गराएका छन्। जनताले गठबन्धनभन्दा काम गर्ने जनप्रतिनिधिलाई रोज्ने उनको भनाइ छ। गत निर्वाचनमा पनि एमालेले समर्थन गरेको उम्मेदवारले जितेको र अहिले आफूलाई जनताले मत दिने उनले बताए।

पुरुषोत्तम न्यौपाने।

राष्ट्रिय स्वतन्त्र पार्टी (रास्वपा)बाट रमेश खरेलले उम्मेदवारी दिएका छन्। उनी गत निर्वाचनमा काठमाडौं-१ मा प्रकाशमान सिंहसँग पराजित भएका थिए। अहिले रास्वपामा प्रवेश गरेर उम्मेदवार बनेका हुन्।

यसैगरी, हाम्रो नेपाली पार्टीबाट चन्द्रप्रकाश सुवेदी, नेपाल मजदूर किसान पार्टीबाट मुक्ति यादव, नागरिक उन्मुक्ति पार्टीबाट डा. कमरुल्लाह अन्सारी र राष्ट्रिय प्रजातन्त्र पार्टीबाट सोनेलाल यादव तेलीले उम्मेदवारी दर्ता गराएका छन्।