नेपालमा हुने एसीसी प्रिमियर कपको खेलतालिका सार्वजनिक

आगामी वैशाख पहिलो साता नेपालमा हुने एसीसी पुरुष प्रिमियर कपको खेल तालिका सार्वजनिक गरिएको छ।

काठमाडौंको कीर्तिपुरस्थित त्रिवि क्रिकेट मैदान र मूलपानी क्रिकेट मैदानमा प्रतियोगिता सञ्चालन हुनेछ। वैशाख ५ देखि १८ गतेसम्म हुने प्रतियोगितामा १० देश प्रतिस्पर्धा गर्नेछन्।

नेपाल समूह ‘ए’ मा रहेको छ। नेपाल रहेको समूहमा ओमन, कतार, मलेशिया र साउदी अरब छन्। त्यस्तै, समूह ‘बी’ मा यूएई, हङकङ, कुवेत, सिंगापुर र बहराइन छन्।

उद्घाटन खेल त्रिवि क्रिकेट मैदानमा वैशाख ५ गते नेपाल र मलेशियाबीच हुनेछ। सेमिफाइनल खेल वैशाख १६ गते र तेस्रो स्थानका लागि वैशाख १७ गते प्रतिस्पर्धा हुनेछ। फाइनल खेल वैशाख १८ गते तय गरिएको छ।

प्रतियोगिताको विजेता टोलीले एशिया कप खेल्न पाउनेछ। एशिया कपमा भारत, पाकिस्तान, श्रीलंका, बाङ्लादेश र अफगानिस्तानसँगै एसीसी प्रिमियर कपको विजेता टोली प्रतिस्पर्धा गर्नेछ।