कर्णालीको योजना आयोगको उपाध्यक्षमा योगेन्द्र शाही
कर्णाली प्रदेश नीति तथा योजना आयोगको उपाध्यक्षमा योगेन्द्र शाही नियुक्त भएका छन्।
मन्त्रिपरिषद् बैठकले शाहीलाई आयोगको उपाध्यक्षमा नियुक्त गर्ने निर्णय गरेको कर्णाली प्रदेश सरकारका प्रवक्ता एवं आन्तरिक मामिला तथा कानूनमन्त्री कृष्णबहादुर जिसीले बताए।
त्यस्तै, मन्त्रिपरिषद् बैठकले मुख्यमन्त्रीको प्रमुख प्रशासनिक सल्लाहकार विज्ञका रूपमा नेपाल सरकारका सेवानिवृत्त सहसचिव भरतकुमार शर्मालाई नियुक्त गर्ने निर्णय गरेको छ। वरिष्ठ आर्थिक सल्लाहकारमा नेपाल राष्ट्र ब्यांकमा कार्यरत उपनिर्देशक शालिकराम पोख्रेललाई सिफारिश गर्ने बैठकले निर्णय गरेको उनले बताए।
मन्त्रिपरिषद् बैठकले ‘कर्णाली प्रदेश प्रशिक्षण प्रतिष्ठान स्थापना तथा सञ्चालन सम्बन्धमा व्यवस्था गर्न बनेको विधेयक, २०७९’ र कर्णाली प्रदेश खेलकूद विकास ऐन, २०७६’ लाई संशोधन गर्न बनेको विधेयकलाई प्रदेश सभा बैठकमा पेश गर्न स्वीकृति प्रदान गरेको छ।
प्रवक्ता जिसीका अनुसार, ‘भूमि व्यवस्था कृषि तथा सहकारी मन्त्रालयको खाद्य अधिकार तथा सम्प्रभुता पहिलो संशोधन नियमावली, २०७९’ लाई पनि बैठकले स्वीकृत गरेको छ।
भौतिक पूर्वाधार, ऊर्जा तथा जलस्रोत मन्त्रालय मार्फत सञ्चालनमा रहेको रानीघाट तेलपानी १८ किलोमिटर सडक निर्माणको लागि १.१४ हेक्टर वन क्षेत्रको जग्गा प्राप्त गर्नका लागि नेपाल सरकार समक्ष मन्त्रिपरिषद् बैठकले सिफारिश गर्ने निर्णय गरेको छ।
-1732353496.jpg)
-1732261651.jpg)