वात्स्यायनलाई पोखरामा नागरिक अभिनन्दन

कलाकार दुर्गा बराल ‘वात्स्यायन’ लाई शनिबार पोखरामा नागरिक अभिनन्दन गरिएको छ।

पोखरेली युवा सांस्कृतिक परिवारको अगुवाइमा पोखराका विभिन्न ३२ साहित्यिक र वाङ्मयिक संस्थाको पहलमा पोखरामा रथारोहण सहित अभिनन्दन गरिएको हो। उनी आजकै दिन ८० वर्ष पूरा गरी ८१ वर्ष प्रवेश गरेका छन्।

कलाकार बरालकै निवास पोखरा–३ नदीपुरबाट शुरू भएको रथारोहण पोखरा विन्ध्यवासिनी मन्दिर परिसरमा समापन भएको थियो। उनको अभिनन्दनका लागि बाटोमा पोखरेलीले आफ्नो घर अगाडि गाग्रीलाई पुष्पगुच्छाले सजाएर स्वागत गरेका थिए।

बरालले चित्रकारितामा सक्रिय भई नेपाली चित्रकारितालाई अतियथार्थवादी धारमा डोर्‍याउन गरेको अतुलनीय योगदानको कदरस्वरूप रथारोहण गरिएको पोखरेली युवा सांस्कृतिक परिवारका अध्यक्ष उपेन्द्र पौडेलले बताए।

रथारोहणमा वरिष्ठ साहित्यकाहरू सरुभक्त, तीर्थ श्रेष्ठ, वरिष्ठ गायिका हरिदेवी कोइराला लगायत कलाकार सहभागी थिए। साहित्यकार, कलाकार, नागरिक समाज, विद्यार्थी लगायतले ब्यानर सहित उपस्थिति जनाएका थिए। समारोहमा उनकी धर्मपत्नी, छोराहरू र परिवारका सदस्यको पनि उपस्थिति थियो।