सुकुम्बासी पक्राउको विरोधमा प्रदर्शन (तस्वीरहरू)

काठमाडौंको थापाथलीस्थित सुकुम्बासी बस्तीबाट दुई जनालाई पक्राउ गरेको विरोधमा माइतिघर मण्डलमा प्रदर्शन गरिएको छ।

गत मंसीर १२ गते थापाथलीस्थित सुकुम्बासी बस्ती हटाउँन खोज्दा काठमाडौं महानगरको टोली र सुकुम्बासीबीच झडप भएको थियो। झडपमा केही नगर प्रहरी घाइते भएका थिए।

त्यसलाई लिएर महानगरपालिकाले ६ जना विरुद्ध किटानी जाहेरी दिएको थियो। काठमाडौं प्रहरी परिसरले ६ जना विरुद्ध पक्राउ पुर्जी जारी गरेको छ। जसमध्ये दुई जना पक्राउ परेका छन्।

उनीहरूको रिहाइको माग गर्दै सुकुम्बासीले प्रदर्शन गरेका हुन्। संयुक्त राष्ट्रिय सुकुम्बासी मोर्चा नेपालको अगुवाइमा आइतबार माइतिघर मण्डलमा प्रदर्शन गरिएको हो।

सुकुम्बासीहरू दैनिक प्रदर्शन गर्दै आएका छन्। प्रहरीले पक्राउ गरेका दुवै जनालाई रिहा नगर्दासम्म प्रदर्शन जारी रहने मोर्चाले जनाएको छ।