निर्णायक खेलमा भिड्दै नेपाल र यूएई
आईसीसी विश्वकप लिग-२ अन्तर्गत आज नेपाल र यूएई निर्णायक खेलमा प्रतिस्पर्धा गर्दै छन्।
आजको खेल नेपाल र यूएई दुवैका लागि महत्वपूर्ण रहेको छ। आजको खेल जितेमा नेपालको आईसीसी एकदिवसीय मान्यता जोगिनेछ। नेपालले सन् २०१८ मा पहिलो पटक एकदिवसीय मान्यता पाएको थियो।
अहिलेसम्मको अंक तालिकामा नेपालले ३३ मध्ये १६ खेल जितेर ३४ अंक बटुलेको छ। आज जित हासिल गरेमा ३६ अंक बनाएर अमेरिकालाई पछ्याउँदै एकदिवसीय मान्यता जोगाउन सफल हुनेछ। अमेरिकाले सबै खेल खेलिसकेको छ भने ३५ अंक छ।
त्यस्तै, नेपालले विश्वकप क्वालिफायरमा छनोट हुन सबै खेल जित्नै पर्नेछ। अब बाँकी तीनै खेल जितेमा नेपालले ४० अंक बटुलेर नामिबियालाई पछ्याउँदै विश्वकप क्वालिफायर खेल्न पाउनेछ। सबै खेल खेलिसकेको नामिबियाको ३९ अंक छ।
लिग-२ बाट शीर्ष स्थानमा रहेका स्कटल्यान्ड ५० अंक र ओमन ४४ अंकसहित विश्वकप क्वालिफायरमा छनोट भइसकेका छन्। यो लिगबाट शीर्षस्थानमा रहेका तीन टोली विश्वकप क्वालिफायरका लागि छनोट हुनेछ।
त्यस्तै, विश्वकप क्वालिफायरबाट बाहिरिसकेको यूएईका लागि पनि एकदिवसीय वरियता जोगाउन यो खेल महत्वपूर्ण छ। अहिलेसम्म ३३ मध्ये १४ खेल जितेको यूएई ३१ अंक सहित छैटौं स्थानमा छ। यूएईले पनि एकदिवसीय मान्यता जोगाउन बाँकी तीनै खेल जित्नुपर्नेछ।
एक खेल पनि हारेमा अमेरिकाभन्दा पछि पर्नेछ। त्यस्तो वेला पाँचौ स्थानमा रहने अमेरिकाको एकदिवसीय मान्यता जोगिनेछ।
काठमाडौंको कीर्तिपुरस्थित त्रिवि क्रिकेट मैदानमा जारी त्रिदेशीय श्रृंखलाको तेस्रो खेलमा नेपाल र यूएई प्रतिस्पर्धा गर्न लागेका हुन्। नेपाल र यूएईबीचको खेल आज बिहान साढे ९ बजे शुरु हुनेछ।
नेपाल र यूएईबीच भएका पछिल्ला पाँच खेलमा नेपालले नै बलियो देखिएको छ। पाँचमध्ये नेपालले तीन खेल जितेको छ भने यूएईले दुई खेल जितेको छ।
यसअघि नेपाल र यूएईबीच फागुन २२ मा प्रतिस्पर्धा भएको थियो। यूएईमा भएको खेलमा नेपालले यूएईलाई ४२ रनले पराजित गरेको थियो। त्यसअघि फागुन १८ मा भएको खेलमा यूएईले नेपाललाई ६८ रनले पराजित गरेको थियो।
त्यसअघि नेपाल र यूएईले त्रिवि क्रिकेट मैदानमै प्रतिस्पर्धा गरेका थिए। पुस २८ मा भएको खेलमा यूएईले नेपाललाई ८४ रनले पराजित गरेको थियो भने मंसीर १ र ३ मा भएको खेलमा नेपालले यूएईलाई क्रमशः ६ विकेट र तीन विकेटले पराजित गरेको थियो।
-1732261651.jpg)
-1732259528.jpg)
-1732180391.jpg)