गाैतमबुद्ध विमानस्थल निर्माणको अवधि ६ महीना थप
गौतमबुद्ध अन्तर्राष्ट्रिय विमानस्थल निर्माणको समयावधि छ महिना थपिएको छ ।
विमानस्थल निर्माणको करिब अन्तिम चरणमा रहेको र बाँकी काम सम्पन्न गर्न १६ पुससम्म अवधि थप गरिएको नागरिक उड्ययन प्राधिकरणका निर्देशक प्रदीप अधिकारीले बताए ।
निर्माणको समयावधि थपिए पनि लागतमा कुनै फरक नपर्ने उनको भनाइ छ ।
“आगामी पुससम्म सबै काम सक्ने योजनाका साथ काम भइरहेको छ,” उनले भने “अहिले धावनमार्ग, ‘एप्रोन’, ‘ट्याक्सी बे’ को निर्माण भइसकेको छ। अब, भवनको ‘फिनिसिङ’ र ‘लाइटिङ्ग’ को काम मात्र बाँकी भएकाले त्यो पनि छिट्टै सक्ने गरी काम अघि बढाइएको छ ।”
प्राधिकरणका अनुसार तीन हजार ६० मिटरको धावनमार्ग निर्माण सकिएसँगै विमानस्थलको भौतिक प्रगति ७३ प्रतिशत रहेको छ ।
डिसेम्बर २०१७ मा निर्माण सक्ने लक्ष्यसहित ३१ डिसेम्बर २०१४ बाट निर्माण शुरु गरिएको विमानस्थल निर्माणको लागि यो सहित तीनपटक म्याद थप भएकाे छ ।
छ अर्ब २२ करोड ५१ लाख लगानी रहेको उक्त विमानस्थल चिनियाँ निर्माण कम्पनी नर्थवेस्ट सिभिल एभिएशन कन्स्ट्रक्सन ग्रुपले निर्माण गरिरहेको छ ।
विमानस्थल निर्माणमा एशियाली विकास बैंकको सहुलियतपूर्ण ऋण सहयोग छ ।
-1732353496.jpg)
-1732261651.jpg)
