जङ्गलबाट सल्केको आगोले चुहानडाँडाका १४ घर नष्ट
तेह्रथुमको आठराई-६ चुहानडाँडामा गएराति भएको आगलागीबाट हात्तीखर्कमा रहेका १४ घर जलेर पूर्ण रूपमा क्षति भएका छन्।
आगलागीबाट स्थानीय ५० वर्षीया याङ्डोल्मा तामाङ घाइते भएकी छन्। उनलाई थप उपचारका लागि पाँचथर सदरमुकाम फिदिम लगिएको छ।
हात्तीखर्कमा १४ घरमध्ये नौ घरमा बसोबास रहेको र पाँच घर खाली रहेको वडाध्यक्ष कृष्ण बास्कोटाले जानकारी दिए। आगलागीबाट नौ परिवारका ४१ जना विस्थापित छन्। घरमा रहेका अन्नपात र लत्ताकपडा जलेर नष्ट भएका छन्।
आगलागीबाट सोमबहादुर तामाङ, वीरधन घिसिङ, आशबहादुर घिसिङ, भीमबहादुर वाइबा, सूर्यबहादुर योञ्जन र सुरेन्द्र वाइबाको घर जलेर नष्ट भएको छ। दधिराम वाइबाको घरमा बस्दै आएका दोर्जे बल, दलबहादुर तामाङको घरमा बस्दै आएका सुवास घिसिङ र अमरबहादुर वाइबाको घरमा बस्दै आएका लामामणि तामाङको घरसँगै अन्नपात र लत्ताकपडा नष्ट भएको छ। राईबहादुर तामाङ, डिकमान तामाङ, शंकर योञ्जन, जसबहादुर घिसिङ र भक्तबहादुर वाइबाको खाली घर जलेर नष्ट भएको छ।
आगलागीबाट स्थानीयका गोठमा रहेका पशुचौपाया जलेका छन्। आठराईको सुक्खाग्रस्त क्षेत्रमा रहेको हात्तीखर्कमा हरेक वर्ष आगलागी हुने गरेको छ।
बस्तीमा पानीको अत्यन्तै समस्या र फुसको छाना रहेका घर भएकाले बस्ती सखाप हुँदा ठूलो क्षति भएको आठराई गाउँपालिका अध्यक्ष दिलकुमार पाहिमले बताए। तमोर नदी किनारको जङ्गलबाट शुरू भएको आगो बस्तीमा पसेपछि नियन्त्रण बाहिर पुगेको अध्यक्ष पाहिमको भनाइ छ।
अहिले बस्तीमा लागेको आगो नियन्त्रणमा आएको छ। जङ्गलमा लागेको आगो भने नियन्त्रणमा छैन। फिदिम नगरपालिकाको दमकल, प्रहरी र स्थानीयवासीले आगलागी नियन्त्रणको प्रयास गरिरहेका छन्।
जङ्गलमा लागेको आगो नियन्त्रणमा नआउँदा नजिकका अन्य बस्ती समेत जोखिममा छन्। क्षतिको यकीन विवरण आउन बाँकी रहेको छ।
-1732353496.jpg)
