हात्तीको आक्रमणबाट मकवानपुरमा वृद्धाको मृत्यु
जङ्गली हात्तीको आक्रमणबाट मकवानपुरको मनहरी गाउँपालिका-४ मा एक वृद्धाको ज्यान गएको छ।
पर्सा राष्ट्रिय निकुञ्जबाट आएको जङ्गली हात्तीको आक्रमणमा परी फागुन ८ गते वनकरिया टोलकी ६४ वर्षीया राधा अधिकारी गम्भीर घाइते भएकी थिइन्। अधिकारीको उपचारका क्रममा मृत्यु भएको जिल्ला प्रहरी कार्यालय, मकवानपुरले जनाएको छ।
घर नजिकै बसिरहेको वेला जङ्गली हात्तीले आक्रमण गरेको थियो। घाइते अधिकारीलाई उपचारका लागि हेटौंडास्थित चुरेहिल अस्पतालमा ल्याइएको थियो। त्यहाँ उपचार हुन नसकेपछि चितवनको नयाँ मेडिकल कलेज लगिएको थियो।
हात्तीको आक्रमणबाट अधिकारी घाइते भएपछि स्थानीयबासी आक्रोशित बन्दै मनहरी-३ लामिटारमा रहेको पर्सा राष्ट्रिय निकुञ्जको लामिटार पोस्टमा सोमबार तोडफोड समेत गरेका थिए। उनीहरूले सेनाले सुरक्षा गस्तीका लागि प्रयोग गर्दै आएको गाडी, कार्यालय र गोलघरमा क्षति पुर्याएका थिए।
-1732261651.jpg)
-1732259528.jpg)
