आशिफ, ज्ञानेन्द्र र कुशलको अर्धशतकमा नेपालको शानदार जित

तीन जना खेलाडीले अर्धशतक प्रहार गरेपछि नामिबिया विरुद्धको खेलमा नेपालले सहज जित हासिल गरेको छ।

आईसीसी विश्वकप लिग-२ अन्तर्गत शनिबार भएको खेलमा नेपालले नामिबियालाई तीन विकेटले पराजित गरेको हो। नामिबियाले दिएको २७५ रनको लक्ष्य नेपालले सात विकेटको क्षतिमा ४७.३ ओभरमा पूरा गरेको छ।

नौ रनमै कुशल भुर्तेललाई गुमाएको नेपालका लागि आशिफ शेख र ज्ञानेन्द्र मल्लले १३९ रनको साझेदारी गरेका थिए। जसमा आशिफले ९८ बलमा ८१ रन र ज्ञानेन्द्रले ७४ बलमा ६५ रन बनाएका थिए।

त्यसपछि आएका कुशल मल्लले पनि नेपालका लागि अर्धशतक प्रहार गरे। उनले ४९ बलमा ६२ रन बनाए। त्यस्तै, रोहित पौडेलले ४९, सोमपाल कामीले आठ, सन्दीप जोराले तीन तथा दीपेन्द्रसिंह ऐरी र कुशल भुर्तेलले एक-एक रन बनाए।

नामिबियाका लागि रुबेन ट्रम्पेलमनले तीन, बेनार्ड स्कल्जले दुई र टंगेनी लुंगामेनीले एक विकेट लिए।

यसअघि टस हारेर ब्याटिङको निम्तो पाएको नामिबियाले ६ विकेटको क्षतिमा २७४ रन बनायो। नामिबियाका लागि जेन ग्रिनले ७५ रन बनाए। उनले ६३ बलमा ११ चौका र एक छक्का प्रहार गरे।

त्यस्तै, पिक्की या फ्रेन्सले ४९, ह्यान्डी लोरेन्सले ४१, रुबेन टुम्पेलमनले २४, मिचेल भानलिंगेनले २२ र कार्ल ब्रिक्स्टोकले २० रन बनाए।

नेपालका लागि सन्दीप लामिछानेले तीन र करण केसीले एक विकेट लिए। अन्तिम पाँच ओभरमा नेपाली बलर महँगा सावित भएका थिए। नामिबियाले अन्तिम पाँच ओभरमा ८४ रन बनाएको थियो।

त्रिदेशीय शृङ्खला अन्तर्गत पहिलो खेलमा नेपाले नामिबियालाई पराजित गरेको थियो। दोस्रो खेलमा स्कटल्यान्डले नामिबियालाई हराउँदा तेस्रो खेलमा नेपालले स्कटल्यान्डलाई हराएको थियो।

अब पाँचौं खेल सोमबार बिहान ९ बजे त्रिवि क्रिकेट मैदानमा स्कटल्यान्ड र नामिबियाबीच हुनेछ। नेपालको अर्को खेल मंगलबार बिहान ९ बजे स्कटल्यान्डसँग हुनेछ।