सन्दीप लामिछाने राष्ट्रिय टोलीमा छनोट

बलात्कारको अभियोगमा पुर्पक्षका लागि धरौटीमा रिहा भएका सन्दीप लामिछाने राष्ट्रिय क्रिकेट टोलीमा छनोट भएका छन्।

नेपाल क्रिकेट संघ (क्यान)ले बन्द प्रशिक्षणमा रहेका २८ जनामध्ये २० जनालाई दोस्रो चरणको प्रशिक्षणका लागि छनोट गरेको छ। जसमा लामिछाने पनि छनोट भएका हुन्।

क्यानले केही दिनअघि २८ जनालाई बन्द प्रशिक्षणमा राखेको थियो। त्यसमा लामिछाने थिएनन्।

क्यानको माघ १७ गते पोखरामा सम्पन्न बोर्ड बैठकले लामिछानेको निलम्बन फुकुवा गरेको थियो। त्यससँगै उनलाई बिहीबार बन्द प्रशिक्षणमा बोलाइएको थियो।

यसअघि २८ जनाको सूचीमा नरहेका लामिछानेलाई आज जारी गरिएको दोस्रो चरणको २० जनाको सूचीमा राखिएको छ।

नेपालले अर्को साता नामिबिया र स्कटल्यान्डसँग एकदिवसीय क्रिकेट प्रतियोगितामा प्रतिस्पर्धा गर्दै छ। कीर्तिपुरस्थित त्रिवि क्रिकेट मैदानमा हुने त्रिदेशीय शृङ्खलाका लागि लामिछानेलाई टोलीमा समावेश गरिएको हो।