सुर्खेतमा गाडी दुर्घटना: चारको मृत्यु, एक घाइते
सुर्खेतको वीरेन्द्रनगर नगरपालिका-११ झुप्राखोलास्थित रत्न राजमार्गमा गाडी दुर्घटना हुँदा चार जनाको मृत्यु भएको छ।
छिन्चुदेखि सुर्खेततर्फ आउँदै गरेको बाप्र ०१०२६ च ९२१३ नम्बरको गाडी शनिबार राति साढे २ बजे दुर्घटना भएको हो। गाडी सडकबाट ८० मिटर तल खसेको प्रहरीले जनाएको छ।
दुर्घटनामा वीरेन्द्रनगर नगरपालिका-७ का २७ वर्षीय सागर शाही, दैलेखको डुंगेश्वर गाउँपालिका-५ का ३३ वर्षीय दीपेन्द्रजंग शाही, भगवतीमाई गाउँपालिका–५ का ३१ वर्षीय बबिन शाही, गुराँस गाउँपालिका–३ का ३६ वर्षीय राजेन्द्र बिसीको मृत्यु भएको जिल्ला प्रहरी कार्यालय सुर्खेतले जनाएको छ। उनीहरूको उपचारका क्रममा कर्णाली प्रदेश अस्पताल सुर्खेतमा मृत्यु भएको हो।
यस्तै‚ दैलेखको भैरवी गाउँपालिका–५ दैलेखका २५ वर्षीय वीरेन्द्रराज शाही गम्भीर घाइते छन्। प्रदेश अस्पतालमा उनको उपचार भइरहेको प्रहरीले जनाएको छ। -रासस
-1732353496.jpg)
