धनकुटाको सिंधुवा बजारमा आगलागी, ६ घरमा क्षति
धनकुटाको छथर जोरपाटी गाउँपालिकास्थित सिँधुवा बजारमा गएराति आगलागी हुँदा ६ घरमा क्षति पुगेको छ।
पुस २९ गते राति लागेको आगोबाट बजारको काउली चौक नजिकका घरहरू पूर्णरूपमा जलेर नष्ट भएको स्थानीय बासिन्दा दीपक खड्काले बताए। स्थानीय सन्तोष राईको घरबाट शुरु भएको आगोले बजारका दुई घरमा पूर्ण तथा ४ घरमा आंशिक गरी ६ वटा घरमा क्षति पुगेको हो।
आगलागीबाट बजारको काउली चोक नजिकका घरहरुमा क्षति भएको छ। आगोले सन्तोष राई र झमक थापाको घर पूर्णरुपमा तथा डम्बरबहादुर थापा, अर्जुन घिमिरे, लिलाबहादुर थापा र डिगबहादुर खड्काको घरमा आंशिक क्षति पुगेको स्थानीय बासिन्दा सुन्दरमान डङ्गोलले बताए।
नेपाली सेना, नेपाल प्रहरी, सशस्त्र प्रहरी र स्थानीय बासिन्दाले आयोग नियन्त्रणमा लिएका थिए। तेह्रथुमको लालिगुराँस नगरपालिका वसन्तपुरबाट आएको दमकलको सहयोगमा झण्डै तीन घण्टापछि आगो नियन्त्रणमा आएको हो।
चिसो छल्न बालिएको कोइलाबाट आगो सल्किएको हुनसक्ने अनुमान गरिएको छ। क्षतिको विवरण सङ्कलन भइरहेको जिल्ला प्रहरी कार्यालय, धनकुटाले जनाएको छ।
-1732353496.jpg)
