काभ्रे बस दुर्घटना: मृतक १७ मध्ये १३ जनाको सनाखत
काभ्रेपलाञ्चोकको बेथानचोक गाउँपालिका-४ चलाल गणेस्थानमा भएको बस दुर्घटनामा मृत्यु हुने १३ जनाको सनाखत भएको छ।
मंगलबार साँझ भएको दुर्घटनामा १७ जनाको मृत्यु भएको थियो। जिल्ला प्रहरी प्रमुख प्रहरी उपरीक्षक चक्रराज जोशीका अनुसार‚ मृत्यु हुनेमा बनेपा नगरपालिका-११ की ७९ वर्षीया निर्मला तामाङ, ११ वर्षीय योगेश तामाङ, ५० वर्षीय अंकुर तामाङ, ४३ वर्षीया हेमा तामाङ, १० वर्षीय पुष्कर तामाङ, २५ वर्षीया कोपिला तामाङ र ६ वर्षीया श्रेया तामाङ रहेका छन्।
त्यस्तै‚ बनेपा-१४ का ३९ वर्षीय राजकुमार तामाङ, २८ वर्षीया गीता श्रेष्ठ, मण्डनदेउपुर नगरपालिका-१ का ३७ वर्षीया जेली तामाङ, धुलिखेल नगरपालिका-११ का ३० वर्षीय बुद्ध तामाङ र बेथानचोक गाउँपालिका-५ की ३२ वर्षीया मञ्जु तामाङको पनि दुर्घटनामा मृत्यु भएको प्रहरी उपरीक्षक जोशीले जानकारी दिए।
यस्तै‚ बस चालक ललितपुरको महाँकाल–४ घर भई हाल पनौती नगरपालिका-४ बस्ने २२ वर्षीय सन्तोष तिमल्सिनाको पनि दुर्घटनामा मृत्यु भएको छ। घाइते केहीको अवस्था चिन्ताजनक रहेको प्रहरीले जनाएको छ। मृतकमध्ये चार जनाको सनाखत हुन बाँकी छ।
प्रहरीको प्रारम्भिक अनुसन्धान अनुसार, बस अत्यधिक गतिमा गुडेर दुर्घटना भएको हो। बस सडक मोडको भित्तामा ठोक्किएपछि दुर्घटना भएको थियो। बसमा ३९ यात्रु थिए। घाइतेको धुलिखेल अस्पताल, बनेपास्थित शिर ममोरियल अस्पताल, मध्यपुर ठिमी अस्पताल, वीर अस्पताल, न्यूरो अस्पताल बाँसबारी लगायत अस्पतालहरूमा उपचार भइरहेको प्रमुख जिल्ला अधिकारी हुमकला पाण्डेले बताइन्।
बा३ख ४३८५ नम्बरको रिजर्भ बस दुर्घटना हुँदा २२ जना घाइते भएका छन्। मृत्यु भएकामध्ये सात जना बनेपाको एउटै वडाका छन्। बनेपा-११ का कुमार तामाङको नातिको व्रतबन्धमा बेथानचोक गाउँपालिका-५ च्याल्टी पुगेर फर्किंदै गरेको बस दुर्घटनामा परेको हो। -रासस
-1732353496.jpg)
