प्रहरीका चर्चित अनुहार पराजित, २५ वर्षपछि पूर्व आईजीपी प्रधानको जित
प्रहरी सेवाबाट अवकाशपछि राजनीतिमा लागेका केही चर्चित अनुहार प्रतिनिधि सभाको चुनावमा पराजित भएका छन् भने पूर्व आईजीपी ध्रुवबहादुर प्रधान साढे दुई दशकपछि जित हासिल गर्न सफल भएका छन्।
प्रहरी प्रमुखबाट अवकाश लगत्तै राष्ट्रिय प्रजातन्त्र पार्टी (राप्रपा)मा जोडिएका ध्रुवबहादुर प्रधान २५ वर्षको पर्खाइपछि सांसद बनेका छन्। नवलपरासी (पश्चिम)-२ बाट प्रधानले नेपाली कांग्रेसका देवेन्द्रराज कँडेललाई १५ हजारको फराकिलो मतान्तरले हराएका हुन्। प्रधानले ३४ हजार ७६४ मत ल्याए भने कँडेलले १९ हजार ५९४ मत ल्याए।
आईजीपीबाट अवकाश पाए लगत्तै राजनीतिमा सक्रिय भएका प्रधानलाई पार्टीमा बलियो पकड बनाए पनि चुनाव जित्न अढाइ दशक लाग्यो। प्रधानको आईजीपीमा बढुवा विवादास्पद बनेको थियो। २०५३ सालमा अच्युतकृष्ण खरेललाई गृह मन्त्रालयको सल्लाहकारमा सरुवा गरेर प्रधानलाई लगिएको थियो। खरेलले सर्वोच्च अदालतमा मुद्दा हालेपछि प्रधानको बढुवा गैरकानूनी ठहरिएको थियो।
प्रधानसँगै अन्य दुई जना पूर्व प्रहरीले चुनाव जितेका छन्। सर्लाही-१ बाट पूर्व प्रहरी निरीक्षक (इन्स्पेक्टर) रामप्रकाश चौधरी पनि प्रतिस्पर्धीलाई उल्लेख्य मतान्तरले हराउँदै प्रतिनिधि सभा सदस्य बनेका छन्। लोकतान्त्रिक समाजवादी पार्टी (लोसपा)का चौधरी स्वतन्त्र उम्मेदवार मानबहादुर खड्कालाई हराएर सांसद चुनिएका हुन्। चौधरीले २४ हजार ८३८ मत पाए भने खड्काले १८ हजार ४०४ मत पाए।
सुदूरपश्चिमको अछामबाट प्रदेश सभामा चुनिएका मानबहादुर रावल पनि पूर्व प्रहरी हुन्। उनले प्रहरी वरिष्ठ उपरीक्षक (एसएसपी)बाट अवकाश पाएका थिए। अवकाशपछि रावल आफ्ता पिता भैरवसिंह रावलको बिंडो समाउँदै नेपाली कांग्रेसको राजनीतिमा लागेका थिए।
उनी यसपालि अछाम २ ‘ख’ बाट प्रदेश सभा सदस्य निर्वाचित भएका छन्। उनले नेकपा (एमाले)का शिवप्रसाद उपाध्यायलाई पराजित गरे। रावलले ११ हजार २१६ मत ल्याउँदा उपाध्यायले आठ हजार ६३४ मत पाए। रावल पूर्व आईजीपी रमेश चन्द ठकुरीका ब्याची हुन्।
प्रहरी सेवामा छँदा चर्चा कमाएका उम्मेदवारले भने यसपालिको चुनाव हारेका छन्। आईजीपीबाट अवकाश लगत्तै एमालेमा प्रवेश गरेका सर्वेन्द्र खनाललाई काठमाडौं-६ मा राष्ट्रिय स्वतन्त्र पार्टीका शिशिर खनालले हराए। शिशिरले १४ हजार २०४ मत ल्याए भने सर्वेन्द्रले आठ हजार ९११ मत पाए।
२०७६ माघमा सेवानिवृत्त खनाल तीन महीनापछि नै एउटा विवादास्पद राजनीतिक प्रकरणमा सामेल भएका थिए। तत्कालीन संघीय समाजवादी पार्टीका सांसद डा. सुरेन्द्र यादवलाई महोत्तरीबाट जबर्जस्ती काठमाडौं ल्याउन खनाल आफैं खटिएका थिए। तत्कालीन संघीय समाजवादी पार्टीले सरकार जोगाउन आफ्ना सांसद ‘अपहरण’ गरेको आरोप लगाएको थियो। तर, पूर्व आईजीपी खनालले भने सरसल्लाहमै यादवसँग काठमाडौं आएको दाबी गरेका थिए।
केपी शर्मा ओली नेतृत्वको सरकारले खनाललाई प्रहरी प्रमुखमा पदोन्नति गरेपछि राजीनामा दिएका अर्का पूर्व प्रहरी अधिकृत रमेश खरेल पनि पराजित भए। आफूभन्दा कमजोर कार्यक्षमता भएका खनाललाई प्रहरी नेतृत्व सुम्पिएको भन्दै २०७४ सालमा खरेलले राजीनामा दिएका थिए। सुशासन र भ्रष्टाचार विरोधी अभियानमा संलग्न खरेलले अवकाशको चार वर्षपछि भने आफ्नै अगुवाइमा पार्टी खोले। २०७८ मंसीरमा नेपाल सुशासन पार्टी खोलेका खरेल प्रतिनिधि सभामा काठमाडौं-१ बाट उम्मेदवार बनेका थिए।
तर, प्रतिस्पर्धाको सूचीमा भने उनी पाँचौं स्थानमा रोकिए। नेपाली कांग्रेसका नेता प्रकाशमान सिंहले यो क्षेत्रमा सात हजार १४३ मत ल्याएर जित्दा खरेलले तीन हजार १२४ मत पाए।
त्यस्तै, अघिल्लो पटक सांसद बनेका पूर्व डीआईजी नवराज सिलवाल पनि यस पटक भने पराजित भएका छन्। ललितपुर-१ बाट चुनाव लडेका एमालेका उम्मेदवार सिलवाल कांग्रेसका उम्मेदवार उदयशमशेर राणासँग पराजित भएका हुन्। राणा २३ हजार ८६२ मत पाएर सांसद बनेका छन् भने सिलवालले १९ हजार २७८ मत पाए।
समानुपातिक सूचीमा समेत केही प्रहरी अधिकृत अटाएका छन्। तर, त्यसको नतीजा आउन बाँकी छ।
-1732261651.jpg)
-1732259528.jpg)