पैसा बाँडेको आरोप लागेका उम्मेदवारको गाडीबाट १०५ रुपैयाँ बरामद
मतदातालाई रकम बाँडेको आरोप लागेका काठमाडौं निर्वाचन क्षेत्र नम्बर ५ (ख)का प्रदेश सभा उम्मेदवार दीपक निरौला चढेको गाडीबाट १०५ रुपैयाँ रकम बरामद भएको प्रहरीले जानकारी दिएको छ।
क्षेत्र नम्बर ५ का निर्वाचन आचारसंहिता उल्लंघन अनुगमन समितिका प्रतिनिधि सुकदेव बास्कोटाको रोहबरमा प्रहरी वृत्त महाराजगञ्जमा निरौला र उनी चढेको गाडी खानतलासी गर्दा उक्त रकम बरामद भएको वृत्तका प्रहरी नायब उपरीक्षक (डीएसपी) अंगुर जीसीले बताए।
निर्वाचन आचारसंहिता विपरीत पैसा बाँडेको भन्दै प्रतिस्पर्धी समूहले विरोध गरेपछि उनलाई प्रहरीले सुरक्षाका लागि भन्दै मंसीर २ को साँझ नियन्त्रणमा लिएको थियो। निरौला एमालेका तर्फबाट उम्मेदवार हुन्। गाडीमा पर्चा समेत भेटिएको छ। रकम बाँडेको भन्दै विपक्षीले घेराउ गरेपछि प्रहरीले निरौला सहित बूढानीलकण्ठ ६ का वडाध्यक्ष रवि खड्का र प्रदीप डंगोललाई उद्धार गरेको दाबी गरेको थियो।
उम्मेदवार निरौला लगायतलाई क्यान्सर रोगका बिरामी तोक्मान लामाको स्वास्थ्य अवस्थाबारे जानकारी लिन जाँदा राज्य संयन्त्रको दुरुपयोग गरेर प्रहरी बोलाउने र पैसा बाँडेको भनेर बदनाम गर्न खोजिएको काठमाडौं ५ एमाले निर्वाचन परिचालन कमिटी संयोजक शान्ति अधिकारीद्वारा जारी विज्ञप्तिमा जनाइएको छ।
