नेपालले जित्यो साफ च्याम्पियनशिप फूटबलको उपाधि
बाङ्लादेशमा आयोजना भएको यू-१५ महिला साफ च्याम्पियनशिप फूटबलको उपाधि नेपालले जितेको छ।
शुक्रबार बाङ्लादेशको ढाकामा भएको डबल राउन्ड रोबिन लिगको अन्तिम खेलमा नेपालले बाङ्लादेशलाई १-१ गोलको बराबरीमा रोक्दै उपाधि जितेको हो। नेपालका लागि खेलको १४औं मिनेटमा सुशिला केसीले गोल गरेकी थिइन्।
दोस्रो हाफमा भने बाङ्लादेशले बराबरी गरेको हो। खेलको ५४औं मिनेटमा बाङ्लादेशकी खेलाडी रुमाले गोल गर्दै १-१ गोलको बराबरीमा ल्याइन्।
त्यसपछि थप गोल भएन। खेल बराबरीमा सकिँदा नेपाल शीर्षस्थानमा रहँदै च्याम्पियन बनेको हो।
नेपालले चार खेलमा अपराजित रहँदै १० अङ्क जोड्यो। समान चार खेल खेलेको बाङ्लादेशले सात अङ्क जोडेर उपविजेता बन्यो।
भूटान अङ्कविहीन रहँदै घर फर्कियो। प्रतियोगितामा नेपाल, भूटान र बाङ्लादेशको सहभागिता रहेको थियो।
