बलात्कार आरोपित सन्दीप लामिछाने पक्राउ

बलात्कार आरोप लागेका राष्ट्रिय क्रिकेट टोलीका निलम्बित कप्तान सन्दीप लामिछाने त्रिभुवन अन्तर्राष्ट्रिय विमानस्थलबाट पक्राउ परेका छन्।

कतार एअरवेजको विमानबाट आज बिहान नेपाल आएका लामिछानेलाई प्रहरीले विमानस्थलबाटै पक्राउ गरेको हो। उनले सामाजिक सञ्जालमा आज नेपाल फर्किने बताएका थिए।

एक किशोरीलाई बलात्कार गरेको अभियोगमा प्रहरीले पक्राउ पुर्जी जारी गरेपछि विदेशमा रहेका लामिछाने सम्पर्कविहीन भएका थिए। यसपछि नेपाल प्रहरीको इन्टरपोल शाखाको प्रस्तावमा इन्टरपोलले लामिछानेलाई पक्राउ गर्न ‘डिफ्युजन नोटिस’ जारी गरेको थियो।

नाबालिगलाई बलात्कार गरेको आरोपमा लामिछाने विरुद्ध गत भदौ २१ गते प्रहरी वृत्त गौशालामा जाहेरी परेको थियो। जाहेरीमा उनले नाबालिकालाई भदौ ५ गते काठमाडौं र भक्तपुरका विभिन्न स्थानमा घुमाएको र सोही दिनको राति काठमाडौंको एक होटलमा ल्याएर जबर्जस्ती करणी गरेको आरोप छ।

वेस्ट इन्डिजमा क्यारेबियन प्रिमियर लिग (सीपीएल) खेल्न गएका लामिछानेले वेला वेला सामाजिक सञ्जालमा आफू निर्दोष रहेको र आरोप विरुद्ध कानूनी लडाइँ लड्ने लेख्दै आएका थिए। उनले आफू निर्दोष रहेकाले न्याय पाउनेमा विश्वस्त रहेको पनि बताउँदै आएका छन्।